اسلام آباد: پاکستان اور چین کے درمیان دو طرفہ سیاسی مشاورت کا تیسرا دور معنقد ہوا جس میں چین نے پاکستان کی خود مختاری اور علاقائی سالمیت کے لیے حمایت کا اعادہ بھی کیا۔
تفصیلات کے مطابق ترجمان دفتر خارجہ کا کہنا ہے کہ پاکستان اور چین کے درمیان دو طرفہ سیاسی مشاورت کا تیسرا دور 18 مارچ کو بیجنگ میں منعقد ہوا، سیکریٹری خارجہ اسد مجید خان نے پاکستانی وفد کی قیادت کی جبکہ چینی وفد کی قیادت نائب وزیر خارجہ سن ویڈونگ نے کی۔
ترجمان دفتر خارجہ کا کہنا ہے کہ دونوں فریقین نے دو طرفہ تعلقات کے تمام پہلوؤں کا جائزہ لیا، سیاسی اور سیکیورٹی تعاون، تجارت،اقتصادی تعاون اور ثقافتی تبادلے پر اتفاق ہوا۔
ترجمان کے مطابق سیاحت اور عوام کے درمیان تعلقات کو وسعت دینے پر بھی اتفاق کیا گیا، پاکستان اور چین اعلیٰ سطح کی مصروفیات اور ڈائیلاگ میکنزم کو بھی فروغ دیں گے۔
مشاورت میں چین پاکستان اقتصادی راہداری منصوبے کے حوالے سے اپنے عزم کا بھی اعادہ کیا گیا، سیکریٹری خارجہ نے سیلاب کے دوران امداد پر چین کا شکریہ ادا کیا۔
ترجمان کا کہنا ہے کہ چینی نائب وزیر خارجہ نے پاکستان کی خود مختاری اور علاقائی سالمیت کے لیے حمایت کا اعادہ بھی کیا، دونوں فریقین نے باہمی دلچسپی کے متعدد علاقائی اور عالمی امور پر تبادلہ خیال کیا۔
ترجمان کا مزید کہنا تھا کہ پاکستان اور چین نے افغانستان سمیت اہم علاقائی پیشرفت پر قریبی تعاون اور مصروفیت پر اطمینان کا اظہار بھی کیا، پاکستان اور چین کثیر الجہتی پلیٹ فارمز پر بات چیت اور تعاون کو مزید مضبوط کریں گے۔
