اسلام آباد: بھارت نے پاکستان کو پانی کے بہاؤ کا ڈیٹا فراہم کرنے پر رضامندی ظاہر کر دی ہے۔
تفصیلات کے مطابق بھارت نے پاکستان کو ایڈوانس فلڈ ڈیٹا فراہم کرنے کی یقین دہانی کرا دی، پاکستان اور بھارت کے انڈس واٹر کمشنرز کے درمیان 3 روزہ مذاکرات آج ختم ہو گئے۔
مذاکرات میں پاکستانی وفد کی قیادت انڈس واٹر کمشنر مہر علی شاہ نے کی، ذرائع کا کہنا ہے کہ مذاکرات کا اگلا مرحلہ رواں سال 31 مئی سے قبل کرانے پر اتفاق ہو گیا ہے، مئی میں انڈس واٹر کمشنرز کے مذاکرات بھارت میں ہوں گے۔
ذرائع کے مطابق بھارت مذاکرات میں متنازع پن بجلی منصوبوں پر اعتراضات کا جواب دے گا، پاکستان نے پکل دل اور لوئر کلنائی پن بجلی منصوبوں پر اعتراضات اٹھا رکھے ہیں، پاکستان نے 9 دیگر چھوٹے پن بجلی منصوبوں پر بھی اعتراضات اٹھا رکھے ہیں۔
ذرائع کا کہنا ہے کہ بھارت نے ایڈوانس فلڈ ڈیٹا فراہم کرنے کی پاکستان کو یقین دہانی کرا دی ہے، بھارت اسی سال پاکستان کو متنازع پن بجلی منصوبوں کا دورہ بھی کرائے گا۔
