راولپنڈی: پاک بحریہ اور سعودی بحریہ کی میری ٹائم مشق نسیم البحر شمالی بحیرہ عرب میں اختتام پذیر ہوگئی۔
فوج کے شعبہ تعلقات عامہ (آئی ایس پی آر) کے مطابق مشق کا اختتام شمالی بحیرہ عرب میں فائر پاور کے مظاہرے کے ساتھ ہوا۔ کمانڈر رائل سعودی نیول فورسز اس موقع پر مہمان خصوصی تھے۔
نیول چیف ایڈمرل نوید اشرف نے مہمان خصوصی کے ساتھ میزائل فائرنگ کا مشاہدہ کیا۔ جہازوں نے زمین سے سطح زمین اور فضا میں ہدف کو نشانہ بنانے والے میزائل فائر کیے۔
پاک بحریہ اور سعودی نیول فورسز جہازوں کے میزائلوں نے اہداف کو کامیابی سے نشانہ بنایا۔ اہداف کو کامیابی سے نشانہ بنا کر آپریشنل تیاری اور حربی صلاحیتوں کا شاندار مظاہرہ کیا۔
آئی ایس پی آر کے مطابق مشق میں اینٹی سرفیس، اینٹی سب میرین وارفیئر اور مربوط میری ٹائم سکیورٹی آپریشنز شامل تھے، نسیم البحر ہر 2 سال بعد منعقد کی جانے والی دو طرفہ آپریشنل مشق ہے، مشق اسٹریٹجک شراکت داری اور مشترکہ مفادات کے تحفظ کیلیے عزم کی عکاسی کرتی ہے۔
