اسلام آباد: امریکی معاون سیکریٹری برائے سمندر، ماحولیات اور سائنسی امور آج پاکستان پہنچ رہی ہیں، اپنے دورے کے دوران وہ پاکستانی اعلیٰ حکام سے ملاقاتیں کریں گی۔
تفصیلات کے مطابق پاک امریکا موسمیاتی اور ماحولیاتی ورکنگ گروپ کا دوسرا اجلاس کل ہوگا، امریکی سفارت خانے کا کہنا ہے کہ سمندر، ماحولیات اور سائنسی امور کی معاون سیکریٹری مونیکا میڈینا آج پاکستان پہنچ رہی ہیں۔
امریکی سفارتخانے مطابق مونیکا میڈینا حیاتیاتی تنوع اور آبی وسائل پر امریکی نمائندہ خصوصی بھی ہیں۔
مونیکا میڈینا اسلام آباد آمد اور مصروفیات کے بعد کراچی بھی جائیں گی، امریکی نمائندہ خصوصی پاکستانی اعلیٰ حکام سے ملاقاتیں کریں گی۔
ملاقاتوں میں فریقین پاکستان کی موسمیاتی ترجیحات، توانائی امور اور آبی انتظام پر تبادلہ خیال کریں گے جبکہ محفوظ ماحول، آب و ہوا کے معیار اور ٹھوس فضلہ جات کے انتظام پر بھی گفتگو کی جائے گی۔
اجلاس اور ملاقاتوں کے دوران شفاف توانائی کا انتظام اور سائنس و ٹیکنالوجی تعاون میں وسعت بھی زیر غور آئے گی۔
