میلبرن : پاکستان اور آسٹریلیا کے درمیان کھیلے جانے والے دوسرے ٹیسٹ میچ کے تیسرے روزکے اختتام پر آسٹریلیا نے اپنی پہلی اننگز میں دو وکٹوں کے نقصان پر 278 رنز بنالئے۔ جس میں اوپنر ڈیوڈ وارنر کی شاندار سنچری بھی شامل ہے۔
تفصیلات کے مطابق باکسنگ ڈے ٹیسٹ میچ کے تیسرے روز آسٹریلیا نے پاکستان کے 443 رنز کے جواب میں 278 رنز دو وکٹوں کے نقصان پر بنالیے۔ آسٹریلوی اوپنر بلے باز ڈیوڈ وارنر کی شاندار سنچری اور آسٹریلوی نژاد پاکستانی بلے باز عثمان خواجہ نے ناقابل شکست 95 رنز اسکور کیے۔
کینگروز کپتان اسٹیو اسمتھ 10 رنز کے ساتھ کریز پر موجود ہیں۔ آسٹریلیا کی پہلی وکٹ جلد گرنے کے بعد وارنر اور عثمان خواجہ نے اپنا کمال دکھا دیا۔ دونوں نے تیز کھیلتے ہوئے دوسری وکٹ کیلئے ایک سو اٹھانوے رنزبنائے۔ وارنر نے موقع ملنے کے بعد سینچری داغ دی۔ وہ ایک سو چوالیس رنزبناکر آؤٹ ہوئے۔
آسٹریلیا نے ون ڈے کی طرح کھیلتے ہوئے صرف اٹھاون اوورز میں دو سو اٹھتر رنزبنالئے۔ عثمان خواجہ سنچری سے صرف پانچ رنز دوری پرہیں۔
قبل ازیں رین شو کو یاسر شاہ نے پویلین کی راہ دکھائی جبکہ ڈیوڈ وارنر کو اپنی نو بالز کے ذریعے نئی زندگی دینے والے فاسٹ باؤلر وہاب ریاض نے ہی سرفراز احمد کے ہاتھوں کیچ آؤٹ کرایا۔ محمد عامر، سہیل خان اور اظہر علی کے حصے میں کوئی وکٹ نہ آئی۔
واضح رہے کہ پاکستان نے اپنی پہلی اننگز 443 رنز 9 کھلاڑیوں کے نقصان پر ڈیکلیئرڈ کی تھی۔ نائب کپتان نے ذمہ داری کا مظاہرہ کرتے ہوئے اپنے کیریئر کی پہلی ناقابل شکست ڈبل سنچری اسکور کی۔
فاسٹ باؤلر سہیل خان نے بھی برق رفتار نصف سنچری بنائی۔ وہ رن آؤٹ ہوئے۔ جس میں 6 چوکے اور 4 بلند و بالا چھکے شامل ہیں۔ میزبان ٹیم کو پاکستان کا اسکور برابرکرنے کے لئے مزید ایک سو پینسٹھ رنزدرکار ہیں۔
