پاک بنگلادیش کرکٹ میچز کے انعقاد کے لیے راولپنڈی میں مؤثر سیکیورٹی انتظامات کر لیے گئے۔
سی پی او سید خالد ہمدانی کے مطابق راولپنڈی پولیس کے 4000 سے زائد افسران و اہلکار سیکیورٹی ڈیوٹی سرانجام دے رہے ہیں، شہریوں کی سہولت کے مدنظر مؤثر ٹریفک انتظامات کے لیے 350 سے زائد ٹریفک پولیس افسران بھی تعینات کیے گئے ہیں۔
روٹ اور اسٹیڈیم کے اطراف چھتوں پر ماہر نشانہ باز تعینات کیے گئے ہیں، کرکٹ اسٹیڈیم اور گرد و نواح میں 99 اسپیشل پکٹس لگائی گئی ہیں، کرکٹ ٹیموں کے روٹ پر سی سی ٹی وی کیمروں سے مانیٹرنگ کی جا رہی ہے۔
پاک بنگلادیش ٹیسٹ سیریز آج سے شروع ہوگی
کرکٹ اسٹیڈیم اور گرد و نواح میں ایلیٹ فورس، ڈولفن فورس اور ضلعی پولیس کی خصوصی ٹیمیں گشت کے فرائض سر انجام دے رہی ہیں، تمام سینئر افسران ڈیوٹی پر تعینات افسران و جوانوں کو پوائنٹ وائز چیک اور بریف کر رہے ہیں، شائقین کرکٹ مخصوص راستے سے مکمل چیکنگ کے بعد اسٹیڈیم میں داخل ہو سکیں گے۔
پولیس حکام کا کہنا ہے کہ ضلعی انتظامیہ اور دیگر اداروں کے ساتھ باہمی ربط کے ذریعے بہترین انتظامات اور فول پروف سیکیورٹی کو یقینی بنایا جا رہا ہے، شائقین اور ٹیموں کے لیے بہترین انتظامات کو یقینی بنانے کے لیے تمام وسائل بروئے کارلائے جارہے ہیں۔
