ویلنگٹن: پاکستان کے خلاف پہلے ٹی 20 میں نیوزی لینڈ نے جارحانہ بیٹنگ کرتے ہوئے 15 اوورز میں دیا گیا ہدف مکمل کر کے 7 وکٹوں سے فتح اپنے نام کرلی۔
تفصیلات کے مطابق نیوزی لینڈ کے خلاف ویلنگٹن میں کھیلے جانے والے پہلے ٹی 20 میں نیوزی لینڈ نے ٹاس جیت کر پہلے فیلڈنگ کا فیصلہ کیا۔
ون ڈے سیریز کے بعد ٹی 20 میں بھی شاہین کارکردگی دکھانے میں ناکام ہوگئے۔ ٹاپ آرڈر، مڈل آرڈر سب فیل ہوگئے جبکہ فخر زمان، عمر امین، محمد نواز اور سرفراز کوئی بھی کھلاڑی نہ چل سکا۔
پاکستان کی پہلی وکٹ 4 رنز پر گر گئی۔ اوپنر فخر زمان 3 رن بنا کر کیچ آؤٹ ہوگئے جس کے بعد ایک ایک کر کے باری باری سارے کھلاڑی پویلین واپس لوٹتے چلے گئے۔
سب سے زیادہ 41 رنز بابر اعظم نے بنائے، اس کے بعد حسن علی نے 23 رنز بنائے، ان دونوں کے علاوہ کوئی بھی بلے باز ڈبل فگرز میں رنز نہ بنا سکا۔
نیوزی لینڈ کے ساؤتھی اور رینس نے 3، 3 وکٹیں لیں۔
پاکستان نے بدترین کارکردگی کے ساتھ نیوزی لینڈ کو فتح کے لیے 106 رنز کا ہدف دیا۔
جواباً نیوزی لینڈ نے تیز رفتاری کے ساتھ کھیلتے ہوئے 15.5 اوورز میں ہدف عبور کر کے 7 وکٹوں سے فتح اپنے نام کرلی۔
کولن منرو نے جارحانہ بیٹنگ کرتے ہوئے پاکستان کے خلاف 49 رنز بنائے۔ پاکستان کی جانب سے رومان رئیس نے 2 جبکہ شاداب نے 1 وکٹ لی۔
یاد رہے کہ اس سے قبل 19 جنوری کو ویلنگٹن میں پانچویں اور آخری ون ڈے میچ میں نیوزی لینڈ نے پاکستان کو 15 رنز سے شکست دے کر ون ڈے سیریز میں وائٹ واش کردیا تھا۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔
