بلاوایو: پاکستان اور زمبابوے کے درمیان پانچ ون ڈے میچز کی سیریز کا آغاز آج سے بلاوایو میں ہوگا، قومی ٹیم کے کپتان سرفراز احمد نے ٹاس کو اہم قرار دے دیا ہے۔
تفصیلات کے مطابق سہ ملکی ٹی ٹوئنٹی سیریز میں کامیابی کے بعد پاکستان ٹیم اب میزبان زمبابوے کے خلاف پانچ ون ڈے میچز کی سیریز کھیلے گی جس کا آغاز آج سے ہورہا ہے، قومی ٹیم کے کھلاڑیوں نے بیٹنگ، بولنگ اور فیلڈںگ میں خامیاں دور کرنے کے لیے بھرپور پریکٹس کی۔
ایک روزہ میچز کے لیے انجری کا شکار بابر اعظم نے صحت یاب ہوکر ٹیم کو جوائن کرلیا ہے، زمبابوے کے خلاف سیریز میں پاکستان ٹیم فیوریٹ قرار دی جارہی ہے۔
کپتان سرفراز احمد نے کہا ہے کہ زمبابوے کی ٹیم ہوم گراؤنڈ پر آسان نہیں ہوگی، مثبت کھیل پیش کرکے ہی کامیابی حاصل کرنا ہوگی، یہاں سردیوں کا موسم ہے اس لیے ٹاس کی بہت اہمیت ہے، ٹاس ہارنے والی ٹیم مشکل میں گھر سکتی ہے۔
سرفراز احمد نے کہا کہ شاداب خان کی موجودگی میں ایک اور لیگ اسپنر یاسر شاہ کو شامل کرکے ہم انہیں ورلڈ کپ کے لیے آزمانا چاہتے ہیں، یاسر شاہ کو پانچ میں سے کم از کم دو میچ کھلائیں گے۔
انہوں نے کہا کہ ابتدائی تین میچوں میں کامیابی حاصل کرنے کے بعد دوسرے کھلاڑیوں کو موقع دیں گے تاکہ ایشیا کپ سے قبل ہمیں پتہ چل سکے کہ ہمیں کن کھلاڑیوں کو لے کر آگے جانا ہے۔
دونوں ٹیموں کے درمیان دوسرا ون ڈے 16 جولائی، تیسرا 18 جولائی، چوتھا 20 جولائی جبکہ پانچواں اور آخری ون ڈے میچ 22 جولائی کو کھیلا جائے گا، میچ پاکستانی وقت کے مطابق سوا بارہ بجے شروع ہوگا۔
