اسلام آباد : پاک فوج کے اہلکاروں کو ڈی چوک میں تعینات کردیا گیا، رنیجرز اہلکاروں کی شہادت کے بعد اسلام آباد میں پاک فوج طلب کی گئی تھی۔
تفصیلات کے مطابق پاک فوج کے اہلکاروں کو اسلام آباد میں ڈی چوک پر تعینات کردیا گیا جبکہ پولیس کی بکتر بند گاڑیاں بھی ڈی چوک پہنچادی گئیں۔
یاد رہے حکومت نے امن و امان کے قیام کیلئے آرٹیکل دوسو پینتالیس کے تحت پاک فوج کو طلب کیا ہے اور شرپسندوں سے آہنی ہاتھوں سے نمٹنے اور موقع پر گولی مارنے کے بھی واضح احکامات دیے گئے ہیں۔
سیکیورٹی ذرائع کا کہنا ہے دہشتگردانہ کارروائی سے نمٹنے کیلئے اقدامات بروئے کار لائے جا رہے ہیں۔
گذشتہ روز سری نگر ہائی وے پر شرپسندوں نے گاڑی رینجرز اہلکاروں پر چڑھا دی جس کے نتیجے میں 4 رینجرز اہلکار شہید جبکہ 5 رینجرز اور پولیس کے جوان شدید زخمی ہوئے تھے۔
مزید پڑھیں : اسلام آباد : رینجرز اہلکاروں کی شہادت : پاک فوج کو بلا لیا گیا
سیکیورٹی ذرائع کے مطابق اب تک شرپسندوں کے حملوں میں رینجرز کے چار اور پولیس کے دو اہلکار شہید ہوچکے جبکہ سو سے زائد پولیس اہلکار زخمی ہیں، جس میں سے متعدد کی حالت تشویشناک ہیں۔
خیال رہے وزیر داخلہ نے پی ٹی آئی مظاہرین کو خبردار کیا تھا کہ پہلے سے بتارہے ہیں ہمیں مجبور کیا گیا تو سخت قدم اٹھائیں گے، بار بار سمجھا رہے ہیں، ریڈ لائن کراس کرنے پرمجبور نہ کریں، اس سے پہلے بھی ڈی چوک میں کبھی کسی کو احتجاج کرنے کی اجازت نہیں دی گئی۔
