راولپنڈی : آرمی چیف جنرل سید عاصم منیر کی ہدایت پر پاک فوج کے 2 دستے ترکی روانہ کردیے گئے ، دستے میں اربن سرچ اینڈ ریسکیو ٹیم ، ریسکیو ماہرین،ا سنائفر کتے، تلاشی کے آلات شامل ہیں۔
تفصیلات کے مطابق عسکری قیادت چیئرمین جوائنٹ چیفس آف سٹاف کمیٹی جنرل ساحر شمشاد مرزا ، مسلح افواج کے سربراہان اور پاکستان کی مسلح افواج نے ترکی میں زلزلہ کے متاثرین سے گہری ہمدردی اور تعزیت کا اظہار کیا ہے۔
آئی ایس پی آر کی جانب سے بیان میں کہا گیا ہے کہ آرمی چیف جنرل سید عاصم منیر کی ہدایت پر پاک فوج کے دو دستے امدادی کاموں کیلئے روانہ کر دئیے گئے ہیں۔
آئی ایس پی آر کے مطابق پاک فوج کی ٹیموں میں اربن سرچ اینڈ ریسکیو ٹیم اور میڈیکل ٹیم شامل ہے ، اربن سرچ اینڈ ریسکیو ٹیم میں ریسکیو ماہرین، سونگھنے والے کتوں، تلاشی کے آلات پر مشتمل ہے۔
اس کے علاوہ میڈیکل ٹیم آرمی ڈاکٹروں، نرسنگ سٹاف اور ٹیکنیشنز پر مشتمل ہے جبکہ ایک میڈیکل ٹیم کے ساتھ 30 بستروں والا موبائل ہسپتال، خیمہ، کمبل اور دیگر امدادی اشیاء شامل ہیں۔
پاک فوج کے ترجمان نے بتایا کہ امدادی ٹیمیں 6اور 7 فروری کی درمیانی رات پاک فضائیہ کے خصوصی طیارے کے ذریعے ترکی کے شہر اڈانا کیلئے روانہ ہوئیں۔
آئی ایس پی آر کا کہنا تھا کہ پاکستانی امدادی ٹیمیں ترک حکومت اوران کے اسلام آباد میں سفارت خانے کے ساتھ قریبی رابطہ کاری کے دوران ترک عوام کے لیے امدادی سرگرمیاں انجام دیں گی۔
ترجمان کےمطابق پاکستانی دستے امدادی کاموں کی تکمیل تک وہاں موجود رہیں گے، پاکستان کے عوام اور مسلح افواج مصیبت کی اس گھڑی میں ترک بھائیوں کے ساتھ کھڑے ہیں۔
یاد رہے ترکیہ اور شام میں قیامت خیززلزلے نے تباہی مچادی، ترکیہ میں اموات کی تعداد 2921 ہوگئی جبکہ ہزاروں زخمی ہیں۔
زلزلے نے شہروں کانقشہ ہی بدل دیا ہے ۔ دوہزارآٹھ سوچونتیس عمارتیں ملبے کا ڈھیربن گئیں۔
ترک صدرطیب اردوان نے ملک میں ایمرجنسی نافذ کرتے ہوئے عالمی برادری سے مدد کی اپیل کردی ہے۔
