اسلام آباد: صدر مملکت آصف علی زرداری نے شانگلا واقعے پر کہا ہے کہ یہ ’پاک چین دوستی‘ کے دشمنوں کی طرف سے ترتیب دیا گیا واقعہ تھا، انھوں نے کہا دکھ کی اس گھڑی میں پاکستانی عوام چینی عوام کے ساتھ کھڑے ہیں۔
صدر آصف زرداری نے آج بدھ کو چین کے سفارت خانے کا دورہ کیا، جہاں چینی سفیر چیانگ زئے دونگ نے ان کا استقبال کیا، صدر مملکت نے چینی شہریوں کی ہلاکت پر پاکستانی حکومت اور عوام کی جانب سے اظہار تعزیت کرتے ہوئے کہا پاکستانی قوم چینی عوام کے غم میں برابر کی شریک ہے۔
صدر آصف زرداری نے کہا پاکستان دہشت گردوں کو خطے میں امن، خوش حالی اور سلامتی کے لہے ہمارے مشترکہ اہداف کو کمزور کرنے کی ہرگز اجازت نہیں دے گا، غیر انسانی حملہ دونوں ممالک کے درمیان پائیدار دوستی اور مشترکہ اقدار پر حملہ ہے، یہ واقعہ پاک چین دوستی کے دشمنوں کی طرف سے ترتیب دیا گیا تھا۔
ایوان صدر کے پریس ونگ کے مطابق انھوں نے کہا کہ دشمن یہ قبول نہیں کر سکتے کہ پاک چین دو طرفہ تعلقات مزید مضبوط ہو رہے ہیں، بہیمانہ فعل میں ملوث مجرموں کو پکڑ کر انصاف کے کٹہرے میں لایا جائے گا، اور پاکستان میں مختلف منصوبوں پر کام کرنے والے چینی شہریوں کی سیکیورٹی یقینی بنانے کے لیے تمام ضروری اقدامات اٹھائے جائیں گے۔
شانگلہ دھماکے کی فوٹیج سامنے آ گئی
چینی سفیر نے تعزیت کے لیے ذاتی طور پر سفارت خانے کا دورہ کرنے پر صدر مملکت کا شکریہ ادا کیا، چینی سفیر نے انسداد دہشت گردی میں تعاون بڑھانے، پاکستان میں چینی کارکنوں کو تحفظ فراہم کرنے کی ضرورت پر زور دیا۔ انھوں نے کہا کہ دہشت گرد انسانیت کے دشمن ہیں، بے گناہ لوگوں کو نشانہ بنانے پر انھیں پکڑنے کی ضرورت ہے۔
چینی سفیر نے پاکستان کے ساتھ تعاون مزید مضبوط بنانے، سی پیک سمیت دیگر منصوبوں کے لیے حمایت جاری رکھنے کے چینی عزم کا اعادہ کیا۔ انھوں نے کہا کہ زندگی کے تمام شعبوں سے تعلق رکھنے والے پاکستانیوں نے دہشت گرد حملے کی مذمت کی ہے۔ انھوں نے کہا کہ چینی کارکنوں نے پاکستان کی سماجی و اقتصادی ترقی میں نمایاں کردار ادا کیا۔
