اسلام آباد : پاکستان اور چین نے اقوام متحدہ اور دوسرےکثیرملکی فورمز پر باہمی تعاون کو مزید مستحکم کرنے پر اتفاق کرتے ہوئے کہا ہے کہ ایک دوسرے کے اہم اور بڑے مفادات کو سپورٹ کیا جائے گا۔
تفصیلات کے مطابق پاکستان اور چین کے درمیان اقوام متحدہ کےامورسے متعلق مشاورت اجلاس ہوا ، مشاورتی اجلاس بذریعہ ویڈیو لنک منعقد کیا گیا ، ڈی جی یواین دفترخارجہ اور ڈی جی برائےانٹرنیشنل آرگنائزیشن چین کے وفود نے قیادت کی۔
اقوام متحدہ سےمتعلق پاک چین مشاورت کے تیسرے دور کا مشترکہ بیان جاری کردیا گیا ، جس میں کہا گیا کہ اجلاس میں سفارتخانوں،یواین نیویارک وجنیواآفسزکےافسران بھی شریک ہوئے، جس میں اقوام متحدہ کے امور پر تفصیلی تبادلہ خیال کیا گیا۔
مشترکہ بیان میں کہا ہے کہ عالمی امورمیں یواین کی ہمہ گیریت،مرکزی کردارکاتحفظ کیاجائےگا، اقوام متحدہ اور دوسرےکثیرملکی فورمز پر تعاون مضبوط بنایا جائے گا۔
بیان میں کہا گیا کہ ایک دوسرے کے اہم اور بڑے مفادات کو سپورٹ کیا جائے گا اور علاقائی وعالمی ہاٹ اسپاٹ ایشوز کے پُر امن حل کے لئے کام کیا جائے گا، خاص طور پر ایشیا کے امن واستحکام کا مل کرتحفظ کیا جائے گا۔
مشترکہ بیان کے مطابق انسداد دہشت گردی، امن افواج کے شعبے میں تعاون جاری رکھا جائے گا اور دہشتگردی سے نمٹنے سمیت امن افواج کے آپریشنز میں یو این کی حمایت کی جائےگی جبکہ عالمی و علاقائی امن اور سلامتی کے لئے کردار جاری رکھیں گے۔
پاک چین مشترکہ بیان میں کہا گیا کہ انسانی حقوق کے شعبے میں تزویراتی کو آرڈینیشن کو مضبوط بنایا جائے گا اور انسانی حقوق کے ایشوز پر دہرے معیار، سیاست کی ملکر مخالفت کی جائےگی جبکہ تعاون کے ذریعے انسانی حقوق کا تحفظ اور فروغ کیا جائے گا۔
