نیویارک میں موجود پاکستانی وفد نے اقوام متحدہ میں اسلامی تعاون تنظیم (او آئی سی) کے رکن ممالک کو بھارت کی جارحیت پر بریفنگ دی۔
پاکستانی وفد کی قیادت کرنے والے سابق وزیر خارجہ بلاول بھٹو زرداری نے بتایا کہ سندھ طاس معاہدے کو معطل کرنے کے بھارتی اقدام سے او آئی سی وفد کو آگاہ کیا گیا، پاکستان نے ان ممالک کی مسلسل اور اصولی حمایت پر اظہار تشکر کیا، جنوبی ایشیا میں امن و سلامتی کے تحفظ کیلیے اجتماعی کوششوں کی ضرورت پر زور دیا۔
بلاول بھٹو زرداری نے بتایا کہ مسئلہ کشمیر کا منصفانہ حل پائیدار امن کیلیے ناگزیر قرار دیا گیا، کشمیری عوام کی امنگوں کے مطابق مسئلہ کشمیر کے حل پر زور دیا گیا، او آئی سی ممالک کو بھارتی پروپیگنڈے اور جھوٹی معلومات سے آگاہ کیا گیا۔
یہ بھی پڑھیں: بھارت کا چہرہ بے نقاب کرنے کے لیے پاکستانی وفد امریکا پہنچ گیا
انہوں نے بتایا کہ کشمیریوں کی جدوجہد کو بدنام کرنے کی سازشوں سے بھی آگاہ کیا گیا، مسلم امہ سے اپیل کی گئی کہ وہ متحد ہو کر ایسے بیانیوں کو مسترد کرے۔
سربراہ پاکستانی وفد نے بتایا کہ بھارت نے جھوٹے الزامات کو سرحد پار حملوں کا جواز بنایا، بھارتی جارحیت نے خطے کو غیر محفوظ بنا دیا ہے، دنیا کو اس خطرناک رجحان کو معمول بننے سے روکنا ہوگا۔
وفد نے جامع مذاکرات، سندھ طاس معاہدے کی بحالی اور مسئلہ کشمیر کے حل پر زور دیتے ہوئے کہا کہ امن کا راستہ صرف مکالمے اور سفارتکاری سے ممکن ہے، او آئی سی ممالک اس نازک وقت میں دنیا کا اخلاقی ضمیر بن کر سامنے آئی ہے، مسئلہ کشمیر کے منصفانہ حل کیلیے حمایت جاری رکھی جائے۔
او ائی سی ممالک نے پاکستان کی طرف سے دی جانے والی شفاف بریفنگ کو سراہا اور اسلام آباد کے ساتھ یکجہتی کا اظہار کیا۔
