اسلام آباد: پاکستان عالمی برادری سے مطالبہ کرتا ہے کہ وہ اقوام متحدہ کی غزہ میں جنگ بندی کی حالیہ قرارداد پر عمل درآمد کیلیے اسرائیل پر زور دے۔
تفصیلات کے مطابق نگراں وزیر خارجہ جلیل عباس جیلانی نے سوشل ویب سائٹ ایکس پر کہا ہے کہ غزہ میں شہادتوں میں اضافہ ہو رہا ہے جبکہ اسرائیل نے وہاں بجلی اور مواصلاتی رابطے بھی بند کردیے ہیں۔
نگراں وزیر خارجہ جلیل عباس جیلانی نے کہا کہ ہمیں معصوم فلسطینیوں کی حالت کو نظر انداز نہیں کرنا چاہیے۔
واضح رہے کہ 7 اکتوبر سے جاری بمباری میں شہید فلسطینیوں کی تعداد 8 ہزار ہو گئی ہے، 3 ہزار 600 بچے بھی شہید ہونے والوں میں شامل ہیں، جب کہ 22 ہزار سے زائد زخمی ہیں۔
اسرائیل کی جانب سے حماس کے فضائی آپریشن کے سربراہ سمیت کئی کارکنان کو شہید کرنے کا دعویٰ سامنے آ رہا ہے، دوسری طرف حماس اور حزب اللہ نے جوابی کارروائیوں میں اسرائیلی فوج کے ٹھکانوں پر حملے کیے، اور اسرائیلی فوج کے بکتر بند اور گاڑیاں تباہ کر دیں۔
