اسلام آباد : پاکستان نے بھارتی وزیر دفاع راج ناتھ سنگھ کے اشتعال انگیزبیان کی مذمت کرتے ہوئے وارننگ دی کہ ہماری امن کی خواہش کو غلط نہیں سمجھا جانا چاہیے۔
تفصیلات کے مطابق پاکستانی دفتر خارجہ نے بھارتی وزیر دفاع کے بیان پر ردعمل دیتے ہوئے کہا کہ پاکستان بھارتی وزیر دفاع کے اشتعال انگیزبیان کی مذمت کرتا ہے، 25 جنوری کوپاکستان نے بھارتی دراندازی کے ناقابل تردید ثبوت فراہم کیے اور پاکستان میں بھارت کےماورائے عدالت ،بین الاقوامی قتل عام کی مہم کے واضح ثبوت ہیں۔
ترجمان کا کہنا تھا کہ بھارت کا مزید شہریوں کو نشانہ بنانے کا دعویٰ واضح طور پر جرم کا اعتراف ہے، عالمی برادری کو بھارت کے ان گھناؤنے اور غیر قانونی اقدامات پر محاسبہ کرنا چاہے۔
دفتر خارجہ نے کہا کہ پاکستان کسی بھی جارحیت کیخلاف اپنی خودمختاری کےتحفظ کیلئے پرعزم ہے، فروری 2019 کو بھی بھارتی جارحیت پر سخت ردعمل کا سامنا کرنا پڑا تھا، اس اقدام نے بھارت کے فوجی برتری کے کھوکھلے دعوؤں کو بے نقاب کیا۔
ترجمان کا مزید کہنا تھا کہ انتخابی فائدے کے لئے بھارتی حکمران نفرت انگیز بیان بازی کا سہارا لے رہے ہیں، بھارت کا غیر ذمہ دارانہ رویہ علاقائی امن کو نقصان پہنچاتا ہے۔
دفتر خارجہ کے مطابق پاکستان نے ہمیشہ خطے میں امن کے لیے اپنے عزم کا اظہار کیا ہے،ہماری امن کی خواہش کو غلط نہیں سمجھا جانا چاہیے، تاریخ پاکستان کے پختہ عزم اور اپنے بھرپور دفاع کی صلاحیت کی گواہ ہے۔
خیال رہے بھارتی وزیر دفاع نے بھی پاکستان میں دہشت گردی کی تصدیق کردی، برطانوی اخبار دی گارڈین نے کہا بھارتی وزیرِ دفاع راج ناتھ سنگھ نے اس بات کی تصدیق کی ہے کہ بھارت کی جانب سے پاکستان میں دہشت گردوں کے ٹھکانوں اور دہشت گردوں کو نشانہ بنایا گیا ہے۔
گزشتہ روز برطانوی اخبار نے بھارت کے پاکستان میں شہریوں کے قتل میں ملوث ہونے کا اعتراف کیا تھا۔
