ترجمان دفتر خارجہ کا کہنا ہے کہ بھارتی وزیراعظم مودی کی اشتعال انگیز تقریر قابل افسوس مگرغیرمتوقع نہیں، مودی نے اقلیتوں پر مظالم، تاریخ مسخ کرنے کی روش نظر انداز کرکے اشتعال انگیز تقریر کی۔
ترجمان دفتر خارجہ کے مطابق آبی وسائل کو ہتھیار بنانے کا حوالہ بین الاقوامی اصولوں سے انحراف ہے، جو قیادت عالمی احترام چاہتی ہے وہ دھمکانے سے پہلے اپنا احتساب کرے۔
انہوں نے کہا کہ بھارتی حکومت کاغیرملکی قتل وغارت، مداخلت سے تعلق جوڑا جا چکا ہے، بھارت غیر ملکی عوام اور علاقوں پر قابض ہے، جو ریاست خود جبر کر رہی ہے وہ مظلوم ہونے کا دعویٰ نہیں کر سکتی۔
ترجمان نے کہا کہ بھارت میں موجودہ حکومت کے نظریاتی حامی ہجوم کے تشدد کو معمول بناچکے، بھارت میں نفرت انگیز سوچ اور اقلیتوں کو نشانہ بنانا معمول بن چکا ہے۔
اُنہوں نے کہا کہ ایسے اقدامات اندرونی سیاسی فائدے کیلئے ہو سکتے ہیں مگر عالمی سطح پر قابل قبول نہیں، بھارت معاہدوں کی پاسداری اور زبان و عمل میں ضبط کا مظاہرہ کرے۔
گزشتہ روز پاکستان نے بھارت کے شاہین میزائل سے متعلق بے بنیاد دعوے کو مسترد کرتے ہوئے کہا تھا کہ بھارتی میڈیا کا پروپیگنڈا حقائق کے منافی ہے۔
دفتر خارجہ نے بھارت کے شاہین میزائل سے متعلق بے بنیاد دعوے کو مسترد کرتے ہوئے کہا تھا کہ بھارتی میڈیا کا شاہین میزائل سے متعلق پروپیگنڈا حقائق کے منافی ہے۔ بھارتی فوج نے ویڈیو جاری کی اور پھر جھوٹا دعویٰ پکڑے جانے پر خود ہی ڈیلیٹ کر دی۔
پاکستان کی روایتی دفاعی صلاحیتیں بھارت کو روکنے کے لیے کافی ہیں، ترجمان دفتر خارجہ
ترجمان کا کہنا تھا کہ بھارتی فوج کی خاموشی جعلی ویڈیو پر سوالات کو جنم دے رہی ہے۔ بھارتی ناکامیوں کو چھپانے کیلیے بے بنیاد دعوے کیے جا رہے ہیں۔
