اسلام آباد : پاکستان نے برطانوی وزیر داخلہ کے پاکستانی مردوں کے حوالے سے بیان پر اظہار تشویش کرتے ہوئے کہا ہے کہ بیان خطرناک رجحانات کو فروغ دے گا۔
تفصیلات کے مطابق پاکستانی دفتر خارجہ کی ترجمان نے پریس بریفنگ کے دوران برطانوی وزیر داخلہ سویلا بریورمین کے پاکستانی مردوں کے حوالے سے بیان پر اظہار تشویش کیا۔
ترجمان دفتر خارجہ کا کہنا تھا کہ برطانوی وزیر داخلہ کا بیان خطرناک رجحانات کو فروغ دے گا، پاکستان جمہوری اقدار پر یقین رکھتا ہے۔
ترجمان نے کہا کہ یونان میں پاکستانی شہریوں کی گرفتاری سے آگاہ کیا گیا ہے، پاکستان تحقیقات اور تفتیش کے لئے یونانی حکام سے مکمل تعاون کرے گا، پاکستان دہشت گردی میں ملوث افراد کو کیفرکردار کردار تک پہنچانے پر یقین رکھتا ہے۔
خیال رہے برطانوی وزیر داخلہ سویلا بریورمین پاکستانی مردوں کے حوالے سے دیے گئے ایک بیان پر تنقید کی زد میں ہیں ، جس میں انہوں نے کہا تھا کہ برطانوی پاکستانی مردوں پر مشتمل گروہ سفید فام لڑکیوں کے جنسی استحصال میں ملوث ہیں۔
ان کا یہ بھی کہنا تھا کہ برطانیہ میں مقیم پاکستانی مردوں کے ’ثقافتی اقدار برطانوی اقدار سے متصادم‘ ہیں۔
سوشل میڈیا پر برطانوی وزیر داخلہ کے اس بیان کو برطانیہ میں ’نسلی لڑائی‘ کا آغاز کرنے کی کوشش قرار دیا جا رہا ہے۔
