وزیر خارجہ اسحاق ڈار نے کہا ہے کہ ملک میں ایک عظیم معیشت بننے کی تمام صلاحیتیں موجود ہیں تاہم اقتصادی سفارت کاری کو ترجیح دینے کی ضرورت ہے.
وزیر خارجہ اسحاق ڈار نے لندن میں پاکستانی ہائی کمیشن افسران سے بات چیت کرتے ہوئے کہا کہ اقتصادی سفارت کاری پاکستان کو مضبوط کرے گی۔ بیرون ملک پاکستانی مشنز کو سرمایہ کاری کو راغب کرنے پر توجہ دینی چاہیے۔
انھوں نے کہا کہ روایتی سفارت کاری کے علاوہ اقتصادی سفارت کاری کو ترجیح دینے کی ضرورت ہے۔ مالیاتی نظم و ضبط لانے اور بیرونی خسارے کو کم کرنے کے لیے مربوط انداز اپنایا جائے۔
وزیر خارجہ اسحاق ڈار کا کہنا تھا کہ اس وقت کی واحد ضرورت وسائل کا مؤثر انداز میں انتظام کرنا ہے۔
خیال رہے کہ وزیر خارجہ کل برسلز میں پہلی نیوکلیئر انرجی سمٹ میں پاکستان کی نمائندگی کرینگے۔ وزیرخارجہ اسحاق ڈار آج برسلز روانہ ہوں گے۔
اسحاق ڈار کا اس حوالے سے کہنا تھا کہ پہلا نیوکلیئر انرجی سمٹ ہو رہا ہے، 29 ممالک شرکت کریں گے۔ میں پاکستان کی نمائندگی کروں گا، کوشش کروں گا پورا حق ادا کروں۔
