پاکستان کو کھیلوں کے ایک اور عالمی ایونٹ کی میزبانی مل گئی ہے اور آئندہ برس دنیا کے اسکواش کھلاڑیوں کو قوم اپنے ملک میں ایکشن میں دیکھے گی۔
پاکستان کو 20 سال بعد ورلڈ اسکواش ایونٹ کی میزبانی مل گئی۔ اگلے سال اپریل میں ورلڈ انڈر 23 اسکواش چیمپئن شپ ملک کے سب سے بڑے شہر کراچی میں منعقد ہوگی۔
ورلڈ اسکواش نے بھی 6 سے 10 اپریل 2025ء تک کراچی میں ایونٹ کے انعقاد کی تصدیق کر دی ہے۔
ورلڈ اسکواش نے چیمپئن شپ کے لیے پہلی بار انعام کی رقم بھی بڑھا دی ہے اور ٹورنامنٹ میں مجموعی طور پر 60 ہزا ڈالرز کی انعامی رقم تقسیم ہوگی۔
پاکستان نے آخری مرتبہ کسی ورلڈ اسکواش ایونٹ کی میزبانی 2005 میں کی تھی اور اگلے برس 2025 میں 20 سال بعد اسکواش کا عالمی ایونٹ پاکستان کی میزبانی میں کھیلا جائے گا۔
واضح رہے کہ پاکستان آئندہ برس 19 فروری سے 9 مارچ تک آئی سی سی چیمپئنز ٹرافی کا میزبان ملک بھی ہے اور 26 سال بعد کسی آئی سی سی ٹورنامنٹ کی میزبانی کر رہا ہے۔ تاہم بھارت روایتی ہٹ دھرمی کا مظاہرہ کرتے ہوئے اس ایونٹ کو سبوتاژ کرنے کے لیے اوچھے ہتھکنڈے استعمال کر رہا ہے۔
اس سے قبل پاکستان نے بھارت اور سری لنکا کے اشتراک سے 1996 کے کرکٹ ون ڈے ورلڈ کپ کی میزبانی کی تھی۔
