اسلام آباد: پاک ایران صورتحال کے پیش نظر قومی سلامتی کمیٹی کا اجلاس کل طلب کیے جانے کا امکان ہے۔
ذرائع کے مطابق ایرانی میزائل حملے کے جواب میں پاکستان کی جانب سے ایرانی صوبے سیستان میں بھرپور کارروائی کے بعد پاک ایران صورت حال پر قومی سلامتی کمیٹی کا اہم اجلاس کل طلب کیے جانے کا امکان ہے۔
ذرائع کے مطابق اجلاس میں عسکری قیادت اور کمیٹی کے دیگر ارکان شریک ہوں گے، اجلاس کو شر پسندوں کے خلاف کارروائیوں پر بریف کیا جائے گا، اس اجلاس میں قومی سلامتی سے متعلق امور بھی زیر غور آئیں گے۔
واضح رہے کہ موجودہ صورت حال کے پیش نظر نگراں وزیر اعظم انوار الحق کاکڑ نے ڈیووس کا دورہ مختصر کر دیا ہے، ترجمان دفتر خارجہ نے نیوز بریفنگ میں بتایا کہ نگراں وزیر اعظم آج وطن واپس پہنچ رہے ہیں، نگراں وزیر خارجہ نے بھی اپنے یوگنڈا کے دورے کو مختصر کر دیا، ادھر ایران میں پاکستان کے سفیر مدثر ٹیپو بھی پاکستان واپس پہنچ گئے ہیں۔
ایران کے میزائل کے جواب میں پاکستان کا بھرپور جواب
پاکستان نے آج ایران کو منہ توڑ جواب دیتے ہوئے آپریشن مرگ بر سرمچار کے تحت ایرانی صوبے سیستان میں دہشت گردوں کے ٹھکانوں پر انتہائی مربوط فوجی کارروائی کی، انٹیلیجنس بیسڈ آپریشن میں متعدد دہشت گرد مارے گئے، ترجمان دفتر خارجہ کا کہنا ہے کہ یہ کارروائی پاکستان کے تمام خطرات کے خلاف قومی سلامتی کے تحفظ کا مظہر ہے، پاکستان اپنی خود مختاری اور علاقائی سالمیت کو چیلنج کرنے کی اجازت نہیں دے گا۔
