اسلام آباد: وزیراعظم عمران خان کا کہنا ہے کہ پاکستان ان چند ملکوں میں شامل ہے جس نے کرونا کی وبا پر قابو پالیا۔
تفصیلات کے مطابق وزیراعظم عمران خان نے میڈیا سے گفتگو کرتے ہوئے کہا کہ پاکستان میں کرونا کا دباؤ بہت کم ہوچکا ہے،3 دن میں پاکستان میں کرونا سے کم اموات ہوئیں،پاکستان ان چندممالک میں سے ہے جہاں وبا پر قابو پایا جا رہا ہے۔
وزیراعظم کا کہنا تھا کہ بھارت سمیت کئی ممالک میں ایسا ہوا جہاں کرفیو لگا دیاگیا،ہماری پہلی حکومت تھی جس نے اسمارٹ لاک ڈاؤن کی بات کی، مشاورت سے وہ کام کیے جو دنیا کو بعد میں سمجھ آئے۔
کنسٹرکشن انڈسٹری سے متعلق عمران خان نے کہا کہ جب انڈسٹری کھولی تو بہت لوگوں نے تنقید کی کہ ملک تباہ کر رہے ہیں،پیسے والوں نے تنقید کی لوگوں کی جانیں خطرے میں ڈال رہے ہیں، ہم نے اسمارٹ لاک ڈاؤن کا فیصلہ رسک لے کر کیا جو درست ثابت ہوا۔
وزیراعظم پاکستان کا کہنا تھا کہ لاک ڈاؤن سے اوپر والے15سے20 فیصدلوگوں کوفرق نہیں پڑا،نچلا طبقہ بالکل کریش ہوگیا،اسے بچانے کے لیے احساس پروگرام شروع کیا،کامیابی سے اتنا بڑا پروگرام بہت کم وقت میں شروع کیاگیا۔
عمران خان نے ایران، میلبورن کی مثال دیتے ہوئے کہا کہ ان ممالک میں احتیاط نہ کرنے پر کیسز میں اضافہ ہوا، اگر ہم نے احتیاط نہ کی تو پھر کرونا کیسز اوپر جاسکتے ہیں۔انہوں نے خبردار کیا کہ عیدالاضحیٰ اور محرم الحرام میں احتیاط نہ کی گئی تو بڑا نقصان ہوگا۔
انہوں نے میڈیا سے گفتگو کرتے ہوئے کہا کہ کامیابی سے عید اور محرم گزرگئے تو پھر ہم نے ریسٹورنٹس کھولنے ہیں،صورتحال بہتر رہی تو اسکول وکالجز بھی ایس او پیز کے تحت کھولیں گے۔
وزیراعظم پاکستان نے عوام کو مخاطب کرتے ہوئے کہا کہ اللہ نے مشکل وقت سے بچایاہے، آپ اس کی قدر کریں۔
