کراچی: قومی کراٹے ٹیم ساؤتھ ایشین کراٹے چیمپیئن شپ کھیل کر 19 میڈلز حاصل کرکے بھارت سے وطن واپس پہنچ گئی۔
ساؤتھ ایشین کراٹے چیمپیئن شپ کے اختتام کے بعد پاکستان کراٹے ٹیم نئی دہلی سے واہگہ کے راستے لاہور پہنچ گئی، وطن واپسی پر کھلاڑیوں کے اہل خانہ اور فیڈریشن کے عہدے داروں نے ٹیم کا شاندار استقبال کیا۔
قومی ٹیم نے ساؤتھ ایشین کراٹے چیمپیئن شپ میں کل 19 تمغے اپنے نام کیے، جس میں سونے، چاندی اور کانسی کے تمغے شامل ہیں ۔
نئی دہلی میں ہونے والی ساﺅتھ ایشین کراٹے چیمپئن شپ میں قومی ٹیم نے 3 سونے ،9 چاندی اور 8کانسی کے تمغے حاصل کیے، پاکستان کی جانب سے باز محمد ، نصیر احمد اور کلثوم نے گولڈ میڈلز جیتے، پاکستان کے دو ریفریز نے ایشین ریفریز کورس بھی پاس کیا۔
قومی کراٹے ٹیم میں شامل خاتون کھلاڑی کلثوم زہرا اس سے قبل سال 2012 کے ساﺅتھ ایشین کراٹے چیمپئن شپ میں سونے کا تمغہ اپنے نام کرچکی ہیں۔
سعدی عباس کو فائنل میں متعصب امپائرنگ کے باعث بھارتی کھلاڑی سے شکست ہوئی تاہم وہ چاندی کا تمغہ حاصل کرنے میں کامیاب ہوئے۔