اسلام آباد: دسمبر اور جنوری میں آئی ایم ایف کے 5 اہداف حاصل نہ ہونے کا خدشہ ہے، جس سے موجودہ قرض پروگرام چلانا مزید مشکل ہوگا۔
تفصیلات کے مطابق آئی ایم ایف کے اہداف کے حصول میں مشکلات کا سامنا ہے ، ذرائع نے بتایا ہے کہ دسمبر اور جنوری میں 5 اہداف حاصل نہ ہونے کا خدشہ ہے۔
ذرائع کا کہنا تھا کہ جنوری تک ڈسکوز کی نجکاری کا ہدف ادھورا رہنے اور مارچ تک 3 ماہ درآمدی بل کے برابر زرمبادلہ ذخائر کا ہدف بھی حاصل نہ ہوسکنے کا خدشہ ہیں۔
ذرائع نے بتایا کہ دسمبر تک ریونیو ہدف حاصل نہیں ہوسکےگا جبکہ جنوری تک زرعی آمدن پر ٹیکس اور اثاثے ڈیکلیئریشن کا ہدف حاصل نہیں ہو سکے گا۔
دستاویز میں کہا کہ آئی ایم ایف کو جنوری تک 2 ڈسکوز کی نجکاری کی یقین دہانی کرائی گئی۔
یکم جنوری سے زرعی آمدن پر ٹیکس عائد کرنے کی شرط بھی پوری نہ ہونے کا خدشہ ہے، چھوٹے کاشتکاروں پر فیڈرل پرسنل انکم ٹیکس کی شرح سےٹیکس عائد کیا جائے گا۔
کمرشل کاشتکاروں پر فیڈرل کارپوریٹ انکم ٹیکس کی شرح سے ٹیکس عائد ہونا ہے، اہداف پر عملدرآمد نہ ہونے کی صورت میں موجودہ قرض پروگرام چلانا مزید مشکل ہوگا۔
ذرائع کا یہ بھی کہنا تھا کہ اہداف پورےنہ ہونے پرقرض کی دوسری کےبعدتیسری قسط کیلئےمزیدسخت اقدامات کرنا ہوں گے۔
