بھارت نے ورلڈکپ کے ایک اور مقابلے میں پاکستانی ٹیم کو شکست سے دوچار کردیا، گرین شرٹس 120 رنز کا ہدف بھی حاصل کرنے میں ناکام رہے۔
پاکستانی بیٹرز ایک بار پھر بھارت کے خلاف ڈھیر ہوگئے، بابر اعظم، افتخار احمد، شاداب خان اور عماد وسیم میچ میں بری طرح ناکام ثابت ہوئے اور بھارت کی جانب سے دیا گیا 120 رنز کا نہایت کم ہدف بھی گرین شرٹس کے لیے کوہ گراں ثابت ہوا۔
پاکستانی بیٹرز ایک کے بعد ایک آتے رہے اور اپنی وکٹ گنوا کر جارتے رہے، بلے بازوں نے بولرز کی محنت پر پانی پھیر دیا. پاکستان کی بیٹنگ کے دوران کسی بھی لمحے میچ پر گرفت نہیں تھی۔ محمد رضوان 31 رنز بنا کر نمایاں رہے.
ان کے علاوہ باقی سارے بیٹرز میچ میں شرمندگی کا شکار ہوئے، کپتان بابر، عثمان خان اور فخر زمان 13، 13 رنز کے مہمان ثابت ہوئے۔ عماد وسیم نے نہایت سست انداز میں 23 بالز پر 15 رنز اسکور کیے۔
بھارت کی جانب سے جسپریت بمراہ نے 14 رنز دے کر 3 وکٹیں حاصل کیں انھیں عمدہ بولنگ کرنے پر مرد میدان قرار دیا گیا۔
ان کے علاوہ ہاردک پانڈیا نے 24 رنز دے کر 2 جبکہ ارشدیپ سنگھ اور اکشر پٹیل نے ایک، ایک پاکستانی بیٹر کو پویلین بھیجا۔
اس سے قبل آئی سی سی ٹی ٹوئنٹی ورلڈکپ کے 19 ویں میچ میں پاکستانی پیسرز نے بھارتی سورماؤں کو ناکوں چنے چبوا دیے، بھارتی سورما شاہینوں کے آگے نہ ٹھہر سکے، پوری ٹیم 20 اوورز بھی نہیں کھیل پائی اور آخری اوور میں 119 رنز بنا کر آل آؤٹ ہوگئی.
پاکستانی بولرز کی شاندار بولنگ کے آگے مخالف بیٹرز بے بسی کی تصویر نظر آئے، بھارتی اوپنرز روہت شرما اور ویرات کوہلی مکمل طور پر ناکام ثابت ہوئے، روہت 13 رنز پر شاہین آفریدی کا جبکہ ویرات کوہلی 4 رنز بنا کر نسیم شاہ کا شکار بنے۔
View this post on Instagram
نسیم شاہ، محمد عامر، حارث رؤف اور شاہین شاہ آفریدی نے پچ کا فائدہ اٹھاتے ہوئے شاندار بولنگ کا مظاہرہ کیا، نسیم اور حارث نے 21، 21 رنز دے کر 3، 3 وکٹیں حاصل کیں.
محمد عامر نے 23 رنز دے کر دو بھارتی بیٹرز کو چلتا کیا جبکہ 29 رنز دے کر شاہین شاہ آفریدی کے حصے میں ایک وکٹ آئی.
بھارتی لیفٹ ہینڈر ریشبھ پنت نے سب سے زیادہ 31 بالز پر 42 رنز بنائے، محمد عامر کی بال پر کپتان بابر اعظم نے ان کا کیچ لیا۔
پاکستانی فیلڈر عثمان خان نے میچ میں کئی کیچ ڈراپ کیے، انھوں نے پہلے محمد عامر کی گیند پر پھر عماد وسیم کی گیند پر ریشبھ کا کیچ چھوڑا، ریشبھ پنت کو میچ میں مجموعی طور پر تین یقین چانسز ملے۔
بھارت کی طرف سے صرف تین بیٹرز ہی ڈبل فیگرز میں داخل ہوپائے، ریشبھ اور روہت کے بعد صرف اکشرپٹیل 20 رنز بنانے میں کامیاب رہے.
بھارت کے دونوں اوپنرز زیادہ دیر تک پاکستانی بولرز کے آگے ٹکنے میں نکام رہے، نسیم شاہ نے صرف چار رنز کے اسکور پر ویرات کوہلی کو چلتا کردیا، روہت شرما 13رنز بنا کر شاہین آفریدی کی گیند پر کیچ آؤٹ ہوگئے.
اس سے قبل بھارت کی جانب سے روہت شرما اور ویرات کوہلی نے پاکستان کے خلاف اوپننگ کا آغاز کیا، میچ شروع ہونے کے ایک اوور بعد ہی بارش کے سبب رک گیا تھا جبکہ بھارت نے بغیر نقصان کے 8 رنز اسکور کیے تھے۔
اس واحد اوور میں روہت شرما نے پاکستانی پیسر شاہین آفریدی کا سامنا کیا اور انھیں تیسری بال پر ایک عمدہ چھکا بھی لگایا، تاہم پہلا اوور مکمل ہونے کے بعد ہی بارش شروع ہوگئی تھی۔
خیال رہے کہ قومی کرکٹ ٹیم کے کپتان بابر اعظم نے اہم مقابلے میں بھارت کے خلاف ٹاس جیت کر فیلڈنگ کرنے کا فیصلہ کیا۔
ٹاس جیتنے کے بعد گفتگو کرتے ہوئے پاکستان کے ٹی ٹئنٹی کپتان بابر اعظم کا کہنا تھا کہ آج کے میچ میں 100 فیصد کارکردگی دیں گے۔ پاکستان کی ٹیم میں اعظم خان کی جگہ عماد وسیم کو شامل کیا گیا ہے.
بابراعظم کا کہنا تھا کہ پہلے میچ میں جو ہوا بھول چکے ہیں، نیا دن ہے 100 فیصد کارکردگی دینے کی کوشش کریں گے.
بھارتی ٹیم کے کپتان روہت شرما کا کہنا تھا کہ ٹاس جیت کر فیلڈنگ کا ہی فیصلہ کرتے، پہلے بیٹنگ کرنا چیلنجنگ ہوگا۔
واضح رہے کہ آئی سی سی ٹی ٹوئنٹی ورلڈکپ میں پاکستان اور بھارت کی کرکٹ ٹیموں کے درمیان میچ کا ٹاس تاخیر کا شکار ہوگیا تھا اور میچ ساڑھ 7 کے بجائے 8 بج کر 20 منٹ پر شروع ہوا تھا.
ورلڈکپ کے سب سے بڑے مقابلے کا ٹاس 7 بجے ہونا تھا۔ بارش کے سبب ٹاس کو ڈیلے کردیا گیا تھا، بارش رکنے کے بعد ہی دونوں کپتان ٹاس کے لیے میدان میں آئے۔
View this post on Instagram
یہ بات بھی قابل ذکر ہے کہ آئی سی سی ایونٹ میں پاک بھارت میچ کے آغاز سے قبل ہی نیویارک کے ناساؤ کرکٹ اسٹیڈیم اور اطراف میں بارش شروع ہوگئی تھی۔
اگرچہ میچ میں تیز بارش کا امکان ظاہر نہیں کیا گیا تاہم بارش اگر میچ کو واش آؤٹ کرتی ہے تو دونوں ٹیموں کو ایک ایک پوائنٹ ملے گا۔
