کراچی: پاک بحریہ نے سمندر میں پھنسی بھارتی ماہی گیروں کی کشتی کو امداد کی فراہمی کرکے نئی تاریخ رقم کردی۔
تفصیلات کے مطابق پاک بحریہ کے جہاز عالمگیر نے کھلے سمندر میں 8 دنوں سے بے یارو مددگار اور مشکلات کا شکار بھارتی ماہی گیروں کی کشتی کو امداد فراہم کی، بھارتی ماہی گیروں کا اظہار تشکر کھلے سمندر میں پاکستان زندہ باد کے نعرے لگادئیے۔
ترجمان پاک بحریہ کے مطابق بھارتی ماہی گیر کشتی ایس ٹی مارس انجن میں خرابی کی وجہ سے کھلے سمندر میں نامساعد حالات اور مشکلات کا شکار تھی، کشتی پر عملے کے 12 افراد سوار تھے جنہیں اشیاء خوردونوش، طبی امداد اور کشتی کو مرمت کی اشد ضرورت تھی۔
پاک بحریہ کے مطابق اطلاع ملتے ہی پی این ایس عالمگیر کی میڈیکل ٹیم نے بھارتی کشتی پر پہنچ کر مریضوں کو طبی امداد اور اشیاء خوردونوش فراہم کیں۔
پی این ایس عالمگیر کی ٹیکنیکل ٹیم نے بھارتی کشتی کے انجن کی فنی خرابی کو دور کیا اور کشتی کو سمندر میں دوبارہ چلنے کے قابل بنایا، بھارتی ماہی گیروں نے بروقت امداد کی فراہمی پر باک بحریہ کا شکریہ ادا کیا اور اظہار تشکر میں پاک بحریہ کے ساتھ مل کر پاکستان زندہ باد کے نعرے لگادئیے۔
ترجمان پاک بحریہ کے مطابق پاک بحریہ بحری سرحدوں کی حفاظت کے ساتھ ساتھ کھلے سمندر میں انسانی مدد کے آپریشنز کی انجام دہی میں بھی ہمیشہ پیش پیش رہتی ہے، یہ آپریشن اس بات کا بھی غماز ہے کہ پاکستان علاقائی امن کا خواہاں ہے۔
