پاک بحریہ کے جہاز پی این ایس ذوالفقار نے خلیج عدن میں 23 ایرانی ماہی گیروں کو بچالیا، ایرانی ماہی گیروں نے مدد کی درخواست کی تھی۔
تفصیلات کے مطابق آئی ایس پی آر کی جانب سے جاری بیان میں بتایا گیا کہ ایرانی ماہی گیرکشتی ال محمدی کی جانب سے پاک بحریہ کے جہاز کو ہنگامی مدد کی کال موصول ہوئی، ایرانی کشتی نے اپنی بندرگاہ سے 1200 ناٹیکل میل پر ایک رکن کے شدید زخمی ہونے کی اطلاع دی۔
ایرانی کشتی نے ماہی گیروں کی کشتی کے انجن خراب ہونے کی بھی اطلاع دی، پی این ایس ذوالفقار کےعملے نے فوری طبی اور تکنیکی مدد فراہم کرکے انجن کی مرمت کی۔
جاری بیان میں آئی ایس پی آر نے مزید بتایا کہ تعیناتی کے دوران پاک بحریہ کے جہاز سمندر میں متاثرہ جہازوں کو ریسکیو کرتے ہیں۔
آئی ایس پی آر کا کہنا تھا کہ انسانی ہمدردی کی بنیاد پر آپریشن پاک بحریہ کے عزم کو ظاہر کرتا ہے، پاک بحریہ ریجنل میری ٹائم سیکیورٹی پٹرولنگ پر باقاعدگی سے تعینات ہے۔
