اسلام آباد : پاکستان نے بھارت کو کلبھوشن یادیو تک قونصلر رسائی کی باضابطہ پیشکش کردی ، ترجمان دفتر خارجہ نے کہا بھارتی جاسوس تک قونصلر رسائی پیشکش پر جواب کا انتظار ہے۔
تفصیلات کے مطابق دفترخارجہ کے ترجمان ڈاکٹرفیصل نے ہفتہ وار بریفنگ دیتے ہوئے کہا کرتارپورپرجلد ملاقات متوقع ہے، بھارتی فورسزکےمقبوضہ کشمیرمیں مظالم جاری ہیں، اقوام متحدہ کاانسانی حقوق کمیشن متعددمرتبہ نشاندہی کرچکا ہے۔
ڈاکٹرفیصل کا کہنا تھا مقبوضہ کشمیرمیں انسانی حقوق کی مسلسل خلاف ورزیاں اور بھارتی فوج کی لائن آف کنٹرول کی خلاف ورزیاں جاری ہیں، آج تیرہویں دن لگاتار بھارتی ڈپٹی ہائی کمشنرکوطلب کرکےاحتجاج کیا۔
تیرہویں دن لگاتار بھارتی ڈپٹی ہائی کمشنرکوطلب کرکےاحتجاج کیا
ایرانی وزیرخارجہ پر امریکی پابندیاں پر ترجمان دفترخارجہ نے ردعمل دیتے ہوئے کہا پاکستان تمام معاملات سفارتکاری سےحل کرنے پر یقین رکھتا ہے۔
افغانستان کے حوالے سے ڈاکٹر فیصل نے کہا پاکستان کے افغانستان مفاہمتی عمل میں مثبت کردار کی بین الاقومی برادری نے تعریف کی ہے، وزیراعظم کے طالبان کے ساتھ مذاکرات پر کام ہو رہا ہے، پاکستان افغان امن عمل کے لیے ہر ممکن مدد فراہم کررہاہے۔
وزیراعظم کے طالبان کے ساتھ مذاکرات پر کام ہو رہا ہے
ان کا کہنا تھا امیدہےدوحہ میں مذاکرات کامیاب ہوں گی اور مذاکرات کے مکمل ہونے تک نتائج پربات نہیں کی جاسکتی ، پاکستان ایک مستحکم اورترقی کرتا ہوا افغانستان چاہتاہے۔
کلبھوشن یادیو کو قونصلر رسائی دینے کے عالمی عدالت انصاف کے فیصلہ پر دفتر خارجہ نے بتایا پاکستان نے بھارت کو کلبھوشن یادیو تک قونصلر رسائی کی باضابطہ پیشکش کردی ہے ، بھارت کوکل قونصلررسائی کی پیشکش کی ہے، اب بھارتی جاسوس تک قونصلررسائی پیشکش پر جواب کا انتظار ہے۔
ڈاکٹر فیصل کا ٹرمپ کے دورہ پاکستان کے حوالے سے کہنا تھا امریکی صدر کے دورہ پاکستان پر کام ہورہا ہے، دورے کی حتمی تاریخ سے متعلق ابھی کچھ نہیں کہا جا سکتا۔
امریکی صدر کے دورہ پاکستان پر کام ہورہا ہے
ترجمان نے مزید کہا مقبوضہ کشمیرمیں مزید بھارتی فوج کی تعیناتی کی خبریں ہیں، آرٹیکل35 اے کے خاتمہ کے ردعمل سے نمٹنے کیلئے ایسا کیا جارہا ہے، آرٹیکل 35 اے کا خاتمہ علاقے میں امن خراب کرنے کی کوشش ہے۔
ان کا کہنا تھا یونان کی جیل میں مدثرارشدنامی شہری کےقتل کی اطلاعات ملی ہیں، جیل میں موجود پاکستانی کی حفاظت جیل حکام کی ذمہ داری ہے ، پاکستانی شہری کی لاش واپس لانے سے متعلق انتظامات کیے جا رہے ہیں۔
