اسلام آباد: پاکستان نے سندھ طاس معاہدے کی معطلی کے بھارتی اقدام پر تشویش کا اظہار کرتے ہوئے اسے جنگ کے مترادف قرار دے دیا۔
ترجمان دفتر خارجہ شفقت علی خان نے میڈیا بریفنگ میں کہا کہ بھارت نے یکطرفہ طور پر سندھ طاس معاہدے معطل کیا، بھارتی رویے سے خطے کے امن کو نقصان کا اندیشہ ہے۔
شفقت علی خان نے کہا کہ سندھ طاس معاہدے کی معطلی کو مسترد کرتے ہیں، یہ معاہدہ عالمی بینک کی ثالثی میں ہوا تھا جسے بھارت یکطرفہ طور پر معطل نہیں کر سکتا۔
یہ بھی پڑھیں: سندھ طاس معاہدہ کیا ہے؟
انہوں نے کہا کہ پانی کی معطلی کا اقدام جنگ کے مترادف ہے، سیکریٹری خارجہ نے معاہدے پر اپنا مؤقف دے دیا ہے، بھارت نے معاہدے پر اپنی پوزیشن سے آگاہ کیا ہے، ہم معاہدے پر اپنی پالیسی کا اعادہ کرتے ہیں، معاہدہ 250 ملین افراد کی زندگی کا معاملہ ہے۔
ترجمان کا کہنا تھا کہ واہگہ بارڈر ہر قسم کی آمدورفت کیلیے بند کر دی گئی، سارک اسکیم کے تحت بھارتیوں کے تمام ویزے منسوخ کر دیے گئے، سکھ یاتری ویزہ معطلی سے مستثنیٰ ہیں، بھارتی ہائی کمیشن کے عملے کی تعداد کم کر کے 30 کر دی گئی، پاکستان کی فضائی حدود بھارتی پروازوں کیلیے بند کر دی گئی۔
’بھارت کے ساتھ تمام تجارتی روابط فوری طور پر معطل کیے جاتے ہیں۔ پاکستان اور مسلح افواج اپنی خود مختاری، سرحدوں اور عوام کے دفاع کیلیے تیار ہیں۔ کل قومی سلامتی کمیٹی کے اجلاس میں پاکستانی قیادت نے بھارت کو جواب دیا۔‘
میڈیا بریفنگ میں ترجمان دفتر خارجہ نے کہا کہ وزیر اعظم شہباز شریف کے حالیہ ترکیہ دورے میں دوست ملک کی قیادت سے مفید بات چیت رہی، وزیر اعظم نے ترکیہ اور پاکستان میں تجارت اور صنعت جیسے امور پر بات کی۔
شفقت علی خان نے بتایا کہ وزیر خارجہ و نائب وزیر اعظم اسحاق ڈار نے ایک روزہ کابل کا دورہ کیا جہاں انہوں نے پاکستان کو درپیش سکیورٹی صورتحال پر بات چیت کی، کابل دورے کے دوران وزیر خارجہ نے افغان عبوری حکومت کے رہنماؤں سے ملاقات کی۔
