جنوبی افریقہ کے خلاف دوسرے ٹی 20 کے لیے قومی ٹیم کا اعلان کردیا گیا ہے۔
پاکستان اور جنوبی افریقہ کے درمیان دوسرا ٹی 20 میچ آج سنچورین میں کھیلا جائے گا میچ پاکستانی وقت کے مطابق رات 9 بجے شروع ہوگا۔
میزبان ٹیم کو پاکستان کے خلاف تین میچوں کی سیریز میں 1-0 کی برتری حاصل ہے۔
تاہم دوسرے ٹی کے لیے پاکستان کی پلیئنگ الیون کا اعلان کردیا گیا ہے، دوسرے میچ میں پاکستان ٹیم میں ایک تبدیلی کی گئی ہے سفیان مقیم کی جگہ جہانداد خان کو فائنل الیون کا حصہ بنایا گیا ہے۔
پاکستان کی ٹیم ان کھلاڑیوں پر مشتمل ہے محمد رضوان کپتان ہیں، دیگر کھلاڑیوں میں بابر اعظم، صائم ایوب، عثمان خان، طیب طاہر، محمد عرفان خان، محمد عباس آفریدی، شاہین آفریدی، جہانداد خان، حارث رؤف اور ابرار احمد شامل ہیں۔
سنچورین کے سپر اسپورٹس پارک میں پاکستان کوئی ٹی 20 نہیں ہارا۔ گرین شرٹس نے اب تک چار میچز کھیلے اور تمام میں فاتح بن کر میدان سے باہر آئے۔
اس کے برعکس میزبان ٹیم کے لیے اس میدان سے اچھی یادیں وابستہ نہیں۔ جنوبی افریقہ نے یہاں 15 میچز کھیل رکھے ہیں اور صرف 6 میں کامیابی حاصل کی جب کہ 9 میں مہمان ٹیموں نے فتوحات سمیٹیں۔
سنچورین میں پاکستان کا سب سے بڑا ٹوٹل 205 رنز اور سب سے بڑی اننگ بھی پاکستانی اسٹار بیٹر بابر اعظم کی ہے۔ انہوں نے 2021 میں 122 رنز بنائے تھے۔
اس میدان میں سب سے بہترین بولنگ فیگر بھی پاکستان کے پاس ہے۔ عمر گل نے 6 رنز کے عوض 5 وکٹیں لی تھی جب کہ 2013 میں گرین شرٹس نے پروٹیز کو 100 رنز پر آؤٹ کیا تھا۔
