لاہور: گھوٹکی میں ٹرین حادثے کے بعد ترجمان ریلوے نے ٹرینوں کے اوقات کار سے متعلق وضاحت کردی۔
تفصیلات کے مطابق ترجمان ریلوے کا کہنا ہے کہ لاہور سے کراچی، کوئٹہ و دیگر شہروں کے لیے ٹرینیں بروقت روانہ ہوں گی۔
ترجمان کا کہنا ہے کہ جناح ایکسپریس کے مسافروں کو قراقرم میں ایڈجسٹ کیا جائے گا جبکہ کراچی ایکسپریس کے مسافروں کو شاہ حسین ایکسپریس میں ایڈجسٹ کیا جائے گا۔
ترجمان کے مطابق قراقرم اپنے مقررہ وقت سہ پہر 3 بجے روانہ ہوگی، شاہ حسین ایکسپریس بھی شام 7 بج کر 30 منٹ پر لاہور سے روانہ ہوگی۔
ترجمان کا مزید کہنا ہے کہ مسافروں کی سہولت کے لیے لاہور اسٹیشن پر ہیلپ ڈیسک بھی قائم کردی گئی ہے۔
یاد رہے کہ آج علیٰ الصبح گھوٹکی اسٹیشن پر کراچی جانے والی سرسید ایکسپریس، ٹریک پر موجود ملت ایکسپریس سے ٹکرا گئی جس کے نتیجے میں 50 سے زائد افراد جاں بحق ہوچکے ہیں۔
