نیویارک : پاکستان نے اقوام متحدہ کی سلامتی کونسل میں مسئلہ کشمیر بھر پورانداز میں اٹھا دیا اور پائیدارامن کے قیام کیلئے سلامتی کونسل پر تنازعات کی بنیادی وجوہات حل کرنے پر زور دیا۔
تفصیلات کے مطابق وزیراعظم کے معاون خصوصی طارق فاطمی نے سلامتی کونسل میں منعقدہ اعلیٰ سطحی کھلی بحث میں گفتگو کرتے ہوئے کہا کشمیری عوام سےاستصواب رائےکے ذریعے حق خودارادیت کے حصول کا وعدہ کیا گیا تھا اب سلامتی کونسل کی ذمے داری ہے کہ وہ کشمیری عوام کے اس حق کو یقینی بنائے۔
معاون خصوصی کا کہنا تھا کہ مسئلہ جموں وکشمیر بدستور سلامتی کونسل کے ایجنڈے پر موجود ہے ، مسئلہ کشمیر کا منصفانہ اور حتمی حل تاحال قراردادوں کے مطابق باقی ہے، بین الاقوامی امن اور سلامتی کی بحالی اس میں کارگر ثابت ہوگی۔
مزید پڑھیں : پاکستان کا اقوام متحدہ میں بھارتی مندوب کو کرارا جواب
انہوں نے زور دیا کہ سلامتی کونسل تنازع کے منصفانہ اور دیرپا حل کے لیے اپنی قراردادوں پر عمل درآمد کے لیے اقدامات کرے۔
اس موقع پر طارق فاطمی نے یو این امن مشنزمیں پاکستان کے طویل المدتی کردار پر بھی روشنی ڈالتے ہوئے کہا کہ پاکستان سب سے طویل عرصے سے خدمات انجام دینے والے ممالک میں شامل ہے، پاکستان امن قائم کرنے والے کمیشن کا بانی رکن بھی ہے۔
