اسلام آباد : پاکستان میں کورونا کی صورتحال خطرناک ہونے لگی ، ایک دن میں چھ ہزار سے زائد کیسز سامنے آئے اور 12 مریض جاں بحق ہوئے۔
تفصیلات کے مطابق پاکستان میں کورونا وائرس کی صورتحال بگڑتی جارہی ہے ، نیشنل کمانڈ ایںڈ آپریشن سینٹر نے ملک میں جاری کورونا وبا کے تازہ ترین اعدادو شمار جاری کردیئے۔
جس میں بتایا گیا ہے کہ ملک میں 24 گھنٹے میں کورونا سے مزید 12 افراد انتقال کرگئے، جس کے بعد کورونا سے انتقال کرنے والے افراد کی مجموعی تعداد 29 ہزار 77 ہوگئی ہے۔
این سی اوسی کا کہنا ہے کہ 24گھنٹے میں کورونا کے 58 ہزار 902 ٹیسٹ کیے گئے، جس میں سے کورونا کے مزید 6 ہزار950 کیسز رپورٹ ہوئے ، اس دوران ملک میں کورونا کے کیسز مثبت آنے کی شرح 11.10 فیصد تک جا پہنچی ہے۔
نیشنل کمانڈ ایںڈ آپریشن سینٹر نے بتایا کہ ملک میں کورونا کے ایک ہزار ے زائد زیرعلاج مریض انتہائی نگہداشت میں ہیں جبکہ ملک بھر میں کورونا سے متاثر ہونے والوں کی مجموعی تعداد 13 لاکھ 60 ہزار 019 تک پہنچ گئی ہے۔
اعدادو شمار کے مطابق سندھ میں کورونا کیسز کی تعداد پانچ لاکھ 20 ہزار 415 ، پنجاب میں 4 لاکھ 60 ہزار 335 ، خیبرپختونخوا میں ایک لاکھ 83 ہزار 865 اور بلوچستان میں 33 ہزار 729 ہے جبکہ اسلام آباد میں ایک لاکھ 15 ہزار 939 ، گلگت بلتستان میں 10 ہزار480 اور آزاد کشمیر میں 35 ہزار130 کیسز سامنے آچکے ہیں
