اسلام آباد : پاکستان میں کورونا کی صورتحال تشویشناک ہونے لگی ، ایک روز میں 42 اموات اور 5 ہزار 800 سے زائد کیسز ریکارڈ ہوئے۔
تفصیلات کے مطابق پاکستان میں کورونا کیسز کے ساتھ ساتھ اموات میں بھی اضافہ ہونے لگا ، نیشنل کمانڈ اینڈ آپریشن سینٹر نے ملک میں جاری کورونا وبا کے تازہ ترین اعدادو شمار جاری کردیئے ہیں۔
جس میں بتایا گیا ہے کہ ملک میں 24 گھنٹے میں کورونا سے مزید 42 افراد انتقال کرگئے، جس کے بعد کورونا سے انتقال کرنے والے افراد کی مجموعی تعداد 29 ہزار 372 ہوگئی ہے۔
این سی اوسی کا کہنا ہے کہ 24گھنٹے میں کورونا کے 59 ہزار 786 ٹیسٹ کیے گئے، جس میں سے کورونا کے مزید 5 ہزار 830 کیسز رپورٹ ہوئے ، اس دوران ملک میں کورونا کے کیسز مثبت آنے کی شرح 9.75 فیصد پر آگئی۔
نیشنل کمانڈ ایںڈ آپریشن سینٹر نے بتایا کہ ملک میں کورونا کے ایک ہزار 590 زیرعلاج مریض انتہائی نگہداشت میں ہیں جبکہ ملک بھر میں کورونا سے متاثر ہونے والوں کی مجموعی تعداد 14 لاکھ 42 ہزار263 تک پہنچ گئی ہے۔
اعداد و شمار کے مطابق سندھ میں کورونا کیسز کی تعداد پانچ لاکھ 46 ہزار 141 ، پنجاب میں 4 لاکھ 83 ہزار 779 ، خیبرپختونخوا میں ایک لاکھ 97 ہزار937 اور بلوچستان میں 34 ہزار 557 ہے جبکہ اسلام آباد میں ایک لاکھ 29 ہزار 758 ، گلگت بلتستان میں 10 ہزار768 اور آزاد کشمیر میں 39 ہزار323 کیسز سامنے آچکے ہیں۔
