اسلام آباد: پاکستان کے نائب وزیر اعظم اسحاق ڈار نے سعودی اور ایرانی وزرائے خارجہ کو قومی سلامتی کمیٹی کے فیصلوں سے آگاہ کیا۔
تفصیلات کے مطابق سعودی وزیر خارجہ فیصل بن فرحان نے نائب وزیر اعظم پاکستان اسحاق ڈار سے رابطہ کیا، اسحاق ڈار نے سعودی وزیر خارجہ کو قومی سلامتی کمیٹی کے فیصلوں سے آگاہ کرتے ہوئے بھارت کے بے بنیاد الزامات کو مسترد کر دیا۔
اسحاق ڈار نے کہا کہ پاکستان کسی بھی جارحیت پر سخت جواب دینے کے عزم رکھتا ہے، پہلگام فالس فلیگ واقعے پر پولیس اسٹیشن میں درج ایف آئی آر نے مودی حکومت کا جھوٹ بے نقاب کر دیا۔
وزیر خارجہ اسحاق ڈار نے ایرانی وزیر خارجہ سید عباس عراقچی سے بھی ٹیلی فونک گفتگو کی، جس میں انھوں نے خطے میں کشیدگی کم کرنے کی ایران کی کوششوں کو سراہا، اور انھیں بریف کیا کہ بھارت کس طرح پاکستان پر بے بنیاد الزامات لگا رہا ہے۔
پاکستان کا واہگہ بارڈر اور فضائی حدود فوری بند کرنے کا فیصلہ ، بھارت کے ساتھ تمام تجارتی روابط معطل
واضح رہے کہ جمعرات کو وزیر اعظم شہباز شریف کی زیر صدارت قومی سلامتی کمیٹی کے اجلاس میں پہلگام حملے کے تناظر میں سیاحوں کی جانوں کے ضیاع پر تشویش کا اظہار کیا گیا، اور 23 اپریل 2025 کو اعلان کردہ بھارتی اقدامات کو یک طرفہ اور غیر ذمہ دارانہ قرار دیا۔
کمیٹی نے پہلگام حملے پر بھارتی الزامات مسترد کیے اور سندھ طاس معاہدہ معطل کرنے کی بھارتی کوشش ناقابل قبول قرار دیا، اعلامیے میں کہا گیا کہ پاکستان نے واہگہ بارڈر فوری طور پر بند کرنے اور تمام بھارتی ٹرانزٹ معطل کرنے کا فیصلہ کر لیا ہے۔ پاکستان نے بھارتی دفاعی، فضائی اور بحری مشیروں کو ناپسندیدہ شخصیت قرار دے کر پاکستان چھوڑنے کا حکم بھی دیا جب کہ بھارتی ہائی کمیشن کا عملہ 30 افراد تک محدود کرنے کا فیصلہ کیا۔
