پاکستان سافٹ ویئر ہاؤسز ایسوسی ایشن PASHA نے مطالبہ کیا ہے کہ 10 جون کو آنے والے وفاقی بجٹ میں آئی ٹی انڈسٹری کے لیے پیکج کا اعلان کیا جائے۔
چیئرمین پاشا، سجاد مصطفی سید نے کہا کہ انفارمیشن ٹیکنالوجی انڈسٹری میں کل 70 کروڑ ڈالر انویسٹمنٹ میں سے 60 کروڑ ڈالر پاشا / P@SHA کی ممبر کمپنیاں لے کر آرہی ہیں ہمارا مطالبہ ہے کہ ٹیکس فری بجٹ دیا جائے اور کوئی نیا ٹیکس نا لگایا جائے۔
انہوں نے کہا کہ آئی ٹی انڈسٹری کے لئے 10 سالہ فکسڈ ٹیکس رجیم (FTR) دی جائے اور بجٹ 2025 – 26 میں فکسڈ ٹیکس رجیم 2025 تا 2035 کا واضح اعلان کیا جاۓ، فکسڈ ٹیکس نظام میں PSEB سے رجسٹرڈ آئی ٹی کمپنیوں پر صرف 0.25 فیصد ودہولڈنگ ٹیکس 2026 کے بعد بھی برقرار رکھنے کا اعلان کیا جائے۔
مہنگائی میں ریکارڈ کمی ہوئی، درست سمت میں جارہے ہیں، وزیر خزانہ نے اقتصادی سروے پیش کردیا
سجاد مصطفی سید کا کہنا تھا کہ اس وقت دنیا بھر کی FDI پاکستان کی آئی ٹی انڈسٹری کی جانب راغب ہو رہی ہے، آئی ٹی کمپنی ملازمین اور ریموٹ ورکرز پر یکساں انکم ٹیکس لاگو کیا جائے، ریموٹ ورکرز پر زیادہ سے زیادہ صرف 1 فیصد انکم ٹیکس ہے جبکہ، آئی ٹی کمپنی ملازمین پر 35 فصد تک انکم ٹیکس لاگو ہے۔
انہوں نے یہ بھی کہا کہ آئی ٹی انڈسٹری کے فارن کرنسی ریوینیو کی نقل و حرکت میں آسانیاں پیدا کی جائیں، مستقل پالیسیاں نہ بنائی گئیں تو پاکستان میں انویسٹمنٹ لانا ناممکن ہو جائے گا ہماری آئی ٹی کمپنیز کو ہراساں کرنا بند کیا جائے اگر کاروبار دوست پالیسیاں نہ دی گئیں تو آئی ٹی انڈسٹری کے چھ لاکھ ملازمین کی نوکریاں داؤ پر لگنے کا خدشہ ہے، ہماری حوصلہ افزائی کی جائے ہم معاشی جنگ بھی عام جنگ کی طرح جیت سکتے ہیں۔
