اسلام آباد / کراچی: پاکستان اسٹاک ایکسچینج میں کاروباری ہفتے کے دوسرے روز مثبت تبدیلی دیکھنے میں آئی اور 100 انڈیکس 207 پوائنٹس اضافے کے بعد 43 ہزار 6 سو 18 پر بند ہوا۔
تفصیلات کے مطابق کاروباری ہفتے کے دوسرے یعنی منگل کے روز پاکستان اسٹاک ایکسچینج میں کاروبار کا آغاز ہوا تو ملا جلا رجحان سامنے آیا تاہم اس کے بعد سرمایہ کاروں نے حصص کی لین دین میں دلچسپی ظاہر کی اور انڈیکس میں تیزی ہوئی۔
ٹریڈنگ کے دوران 100 انڈیکس کم سے کم 43 ہزار 354 پوائنٹس جبکہ تیزی کے دوران 43ہزار 707 پوائنٹس کی حد تک پہنچا، پہلے سیشن میں کاروبار درمیانہ رہا تاہم دوسرے سیشن میں یک دم مارکیٹ میں تیزی ہوئی جو مارکیٹ بند ہونے تک جاری رہی اور اس طرح انڈیکس 207 پوائنٹس اضافے کے بعد 43 ہزار 6 سو 18 پر بند ہوا۔
اسٹاک ایکسچینج میں تیزی، 100 انڈیکس میں 84 پوائنٹس کا اضافہ
کاروبار کے دوران مجموعی طور پر کیمیکل کے شعبے میں سب سے زیادہ 2 کروڑ 79 لاکھ شیئرز کا کاروبار ہوا، جبکہ بینکنگ اور مواصلات کے شعبے بھی بالترتیب ایک کروڑ 72 لاکھ اور ایک کروڑ 34 لاکھ شیئرز کے کاروبار کے ساتھ نمایاں رہے۔
تجزیہ کاروں کی جاری کردہ رپورٹ میں کہا گیا کہ ملک کے شمالی حصے میں سیمنٹ کی قیمتوں میں اضافے کے بعد سیمنٹ کے شعبے میں بھی بڑی تعداد میں شیئرز کا لین دین ہوا۔
نوازشریف کے ہٹنے کے اگلے روز اسٹاک مارکیٹ میں نمایاں تیزی
معاشی تجزیہ کاروں کے مطابق حکومت کی جانب سے گیس کی قیمتوں میں 5 سے 7 فیصد اضافے پر غور کی وجہ سے گیس کے شعبے میں تیزی دیکھنے میں آئی ہے۔
خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔
