کراچی: کاروباری ہفتے کے پہلے روز پیر کو پاکستان اسٹاک ایکسچینج میں زبردست تیزی دیکھی گئی اور 100 انڈیکس نومبر 2018 کے بعد سے اب تک کی بلند ترین سطح یعنی 41 ہزار 657 پوائنٹس پر پہنچ گیا۔
تفصیلات کے مطابق پاکستان اسٹاک مارکیٹ میں تیزی کا تسلسل برقرار ہے۔ دن کے آغاز پر 100 انڈیکس میں 400 پوائنٹس کا اضافہ ہوا اور انڈیکس 41 ہزار 317 پوائنٹس پر پہنچ گیا۔
تاہم دن کے اختتام تک 100 انڈیکس نومبر 2018 کے بعد سے اب تک کی بلند ترین سطح پر پہنچ گیا۔ 100 انڈیکس میں 740 پوائنٹس کا اضافہ ہوا جس کے بعد انڈیکس 41 ہزار 657 پوائنٹس پر پہنچ گیا۔
100 انڈیکس کی رواں برس کم ترین سطح 16 اگست 2019 کو دیکھی گئی تھی جب انڈیکس 28 ہزار 765 پوائنٹس پر پہنچا تھا۔ اب انڈیکس اس کم ترین سطح سے 45 فیصد اوپر آچکا ہے۔
پاکستان اسٹاک مارکیٹ میں گزشتہ کچھ ہفتوں سے زبرست تیزی دیکھی جارہی ہے۔ گزشتہ ہفتے میں 100 انڈیکس میں 184 پوائنٹس کا اضافہ ہوا جس کے بعد انڈیکس 40 ہزار 916 پوائنٹس پر بند ہوا۔
ہفتہ وار رپورٹ کے مطابق گزشتہ ہفتے (9 سے 13 دسمبر کے دوران) انڈیکس کی بلند ترین سطح 41 ہزار 77 پوائنٹس جبکہ کم ترین سطح 40 ہزار 170 پوائنٹس رہی۔
گزشتہ ہفتے اسٹاک مارکیٹ میں 1 ارب 37 کروڑ شیئرز کے سودے ہوئے، کاروباری ہفتے میں مارکیٹ کیپٹلائزیشن 105 ارب روپے بڑھی۔ کاروباری ہفتے کے اختتام پر مارکیٹ کیپٹلائزیشن 7 ہزار 902 ارب روپے رہی۔
