پاکستان نے لبنان کے دارالحکومت بیروت پر اسرائیلی فوج کے فضائی حملوں کی شدید مذمت کی ہے۔
دفتر خارجہ کے ترجمان کی جانب سے جاری کردہ بیان میں کہا گیا ہے کہ عیدالاضحی کے موقع پر کئے گئے یہ حملے بین الاقوامی قوانین، لبنان کی خود مختاری اور نومبر 2024 کے جنگ بندی معاہدے کی کھلی خلاف ورزی ہیں۔
ترجمان کا کہنا ہے کہ اسرائیلی فوجیو ں کی جانب سے طاقت کاوحشیانہ استعمال شہریوں کی زندگی کیلئے خطرہ، علاقائی عدم استحکام میں اضافے کی بڑی وجہ اور پائیدار امن کے قیام کی کوششوں کیلئے نقصان دہ ہے۔
دفتر خارجہ کے ترجمان کے مطابق پاکستان مشکل کی اس گھڑی میں لبنان کی حکومت اور عوام کے ساتھ اظہار یکجہتی کرتا ہے، عیدالاضحیٰ سے ایک روز قبل حملے بین الاقوامی قانون کی سنگین پامالی ہیں۔
ترجمان کا کہنا ہے کہ بے گناہ شہریوں کی زندگیوں کو خطرے میں ڈالنے والے اقدامات ناقابل قبول ہیں، ایسے اقدامات خطے میں عدم استحکام اور امن کی کوششوں کو نقصان پہنچاتے ہیں۔
پاکستان نے عالمی برادری بالخصوص اقوام متحدہ اور جنگ بندی کے مصالحت کاروں پر زور دیا ہے کہ وہ اسرائیلی قابض فوجیوں کے کڑے احتساب اور کشیدگی کومزید بڑھنے سے روکنے کیلئے فوری کارروائی کریں، پاکستان امن، انصاف اور بین الاقوامی قوانین کے اصولوں کے پختہ عزم پر کار بند ہے۔
