اسلام آباد: کرونا وائرس کے پھیلاؤ کے خدشے کے تحت وزارت داخلہ نے افغانستان کے ساتھ چمن بارڈر بند کرنے کے احکامات جاری کردیے، چمن بارڈر کل سے 7 روز کے لیے بند کردی جائے گی۔
تفصیلات کے مطابق کرونا وائرس کے پھیلاؤ کے خدشے تحت پاکستان نے ایران کے بعد افغان سرحد بھی بند کرنے کی تیاریاں شروع کردیں، چمن کے مقام پر پاک افغان سرحد بند کرنے کے احکامات جاری کردیے گئے۔
وزارت داخلہ نے چمن بارڈر بندش کے احکامات جاری کیے ہیں، وزارت داخلہ کے جاری کردہ مراسلے کے مطابق پہلے مرحلے میں چمن بارڈر 7 دن بند رہے گا۔
مراسلے میں کہا گیا کہ چمن بارڈر بندش کا فیصلہ کرونا وائرس کا پھیلاؤ روکنے کے لیے کیا گیا ہے، چمن بارڈر کو کل سے بند کردیا جائے گا۔
خیال رہے کہ چند روز قبل ایران میں کرونا وائرس کا اچانک پھیلاؤ شروع ہوا تھا جس کے بعد حکومت نے پاکستانی زائرین کے ایران جانے پر پابندی عائد کردی تھی جبکہ ایران کے ساتھ سرحد بھی بند کردی تھی۔
ایران میں اب تک کرونا و وائرس سے ہلاکتوں کی تعداد 54 ہوچکی ہے جبکہ وائرس سے متاثرہ افراد کی تعداد 976 ہوگئی ہے۔
بعد ازاں افغانستان میں بھی کرونا وائرس کے مریضوں کی تصدیق ہوگئی جس کے بعد پاکستان نے افغانستان کے ساتھ سرحد بند کرنے کا فیصلہ کیا ہے۔
تاحال پاکستان میں بھی 4 افراد کے کرونا وائرس میں مبتلا ہونے کی تصدیق ہوچکی ہے۔ دنیا بھر میں وائرس سے ہلاک افراد کی تعداد 3 ہزار اور وائرس سے متاثرہ افراد کی تعداد 85 ہزار سے تجاوز کرچکی ہے۔
