اسلام آباد : وزیراعظم شہباز شریف نے قومی سلامتی کمیٹی کا اہم اجلاس آج طلب کرلیا ، جس میں ایران کی حمایت اور دیگر اہم امور پر بڑے فیصلوں کا امکان ہے۔
تفصیلات کے مطابق وزیراعظم شہبازشریف کی زیر صدارت قومی سلامتی کمیٹی کا اہم اجلاس آج دوپہر بارہ بجے ہوگا، اجلاس میں عسکری اور سول قیادت شرکت کرے گی۔
فیلڈ مارشل عاصم منیر دورہ امریکا پرشرکا کو اعتماد میں لیں گے، ذرائع نے بتایا ایران اسرائیل امریکا تنازع پر مشاورت کی جائے گی، جس کے بعد ایران کی حمایت اورد یگر اہم امورپربڑے فیصلوں کا امکان ہے۔
اجلاس میں ملک کی داخلی اورسرحدی سیکیورٹی صورتحال کا بھی جائزہ لیا جائے گا، اجلاس میں وزیر دفاع خواجہ آصف ، وزیر داخلہ محسن نقوی، نائب وزیراعظم اسحاق ڈار ، وزیر خزانہ محمد اورنگزیب اور دیگر شرکت کریں گے۔
مزید پڑھیں : شہباز شریف کی ایرانی صدر سے ٹیلی فون پر بات چیت، امریکی حملوں کی مذمت
گذشتہ روز وزیراعظم شہباز شریف نے ایران پر امریکی حملوں کی مذمت کی ہے اور ایرانی صدر سے ٹیلی فونک گفتگو میں مکمل حمایت کا عزم دہرایا۔
شہبازشریف نے کہا امریکی حملوں میں اُن تنصیبات کو نشانہ بنایا گیا، جو آئی اےای اے کی زیر نگرانی تھیں، امریکی حملے بین الاقوامی قوانین کی سنگین خلاف ورزی ہیں۔
وزیراعظم نے کشیدگی میں کمی کیلئےفوری مذاکرات اورسفارت کاری پر زور دیا، ایرانی صدر نے پاکستان کی حمایت کو سراہا۔
اس سے قبل استنبول میں نائب وزیراعظم اسحاق ڈار سے ایرانی وزیر خارجہ عباس عراقچی کی ملاقات میں بدلتی صورتحال پر تبادلہ خیال کیا گیا۔
