لاہور : پی آئی اے نے لاہور سے ملائیشیا کے لئے پروازوں کا سلسلہ بحال کردیا، کورونا پابندیوں کے بعد پہلی پروازصبح لاہور سے کوالالمپور کے لئے روانہ ہوگئی۔
لاہور ایئرپورٹ پر منعقدہ تقریب میں کیک کاٹا گیا اور مسافروں کو پھول پیش کئے گئے، پی آئی اے اسلام آباد سے کوالالمپور کے لئے ہفتہ وار 2پروازیں پہلے ہی چلارہی ہے۔
وزیر ہوابازی کی ہدایات پر قومی ایئرلائن اپنی پروازوں کی تعداد میں اضافہ کر رہی ہے، عوام کی ضرورت کے پیش نظر پی آئی اے نے پروازوں میں اضافے کا فیصلہ کیا ہے۔
اس حوالے سے وفاقی وزیر ہوابازی سعد رفیق نے کہا کہ گرمیوں کی چھٹیوں کے موقع پر سیاحتی مقامات کی پروازوں میں اضافہ کیاجارہا ہے۔
وزیر ہوا بازی کا کہنا تھا کہ لاہور سے اندرون وبیرون ملک سیاحتی مقامات تک رسائی فراہم کی جارہی ہے، لاہور سے گلگت اوراسکردو کی پروازیں بھی آپریٹ کی جارہی ہیں، باکو اور کوالالمپور کی پروازیں بھی چلادی گئی ہیں۔
محمد صلاح الدین اے آروائی نیوز سے وابستہ سینئر صحافی ہیں اور ایوی ایشن سے متعلقہ امور کی رپورٹنگ میں مہارت رکھتے ہیں