اسلام آباد : ملک بھرمیں آج مظلوم کشمیریوں سے اظہار یکجہتی کیلئے یوم کشمیر منایا جارہا ہے ، اس بار یوم یکجہتی کشمیر کا موضوع ’’مقبوضہ کشمیرکے بچوں کو بچانا ہے۔
تفصیلات کے مطابق ملک بھرمیں آج مظلوم کشمیریوں سے اظہار یکجہتی کیلئے یوم کشمیر منایا جارہا ہے ، آج ملک بھر میں قومی پرچم بھی سرنگوں رہیں گے ، یوم کشمیرمنانےکامقصدمقبوضہ وادی میں بھارتی مظالم کو دنیا میں بے نقاب کرنا ہے ، اس بار یوم یکجہتی کشمیر کا موضوع ’’مقبوضہ کشمیر کے بچوں کو بچانا ہے‘۔
خیال رہے وزیر اعظم عمران خان آج اقوام متحدہ کی جنرل اسمبلی میں خطاب کریں گے ، جس میں پوری دنیا کے سامنے کشمیر کا معاملہ اٹھائیں گے۔
یاد رہے اس سے قبل 30 اگست کو وزیراعظم عمران خان کی اپیل پر ملک بھر میں پاکستان کے کروڑوں عوام کشمیریوں سے فقیدالمثال اظہار یکجہتی کا مظاہرہ کیا تھا، سائرن بجتے ہی قومی ترانے کے بعد کشمیرکا ترانہ پڑھا گیا تھا۔
مزید پڑھیں : مقبوضہ کشمیر میں کرفیو کا 54 واں روز
واضح رہے مقبوضہ کشمیرمیں مسلسل لاک ڈاؤن اور کرفیو کا آج چوون واں روز ہے ، وادی میں کاروباراور تعلیمی ادارے بند اور ٹرانسپورٹ معطل ہے، کشمیری عوام کو کھانے پینے کی اشیا او ردواؤں کے سنگین بحران کا شکار ہیں، مواصلاتی ذرائع کا بلیک آؤٹ بھی بدستور جاری ہے جبکہ موبائل اور انٹرنیٹ سروس بدستور بند ہیں اور ٹی وی اسکرینز تاریک ہیں۔
بھارت کے غاصبانہ قبضے اورجبر کیخلاف مقبوضہ کشمیر کے گلی کوچوں میں پوسٹرزاورہینڈ بلز لگا دئیے گئے ہیں ، پوسٹرز میں بھارت کیخلاف جدوجہد جاری رکھنے کا عزم دہرایا گیا ہے۔
