لاہور : پاکستان جذبہ خیر سگالی کے تحت آج گرفتار بھارتی ونگ کمانڈر ابھی نندن کو رہا کرے گا، وزیر اعظم عمران خان نے بھارتی پائلٹ کو رہا کرنے کا اعلان کیا تھا۔
تفصیلات کے مطابق پاکستان کی جانب سے گرفتار بھارتی پائلٹ ونگ کمانڈر ابھی نندن کو آج بھارتی ہائی کمیشن کے حوالے کیا جائے گا، بھارتی جنگی جہاز کے پائلٹ کو آج سہ پہر واہگہ بارڈر کے راستے وطن واپس بھیجا جائے گا۔
بھارتی ہائی کمیشن نےبھارتی پائلٹ کےسفری دستاویزات مکمل کرلیے ، بھارتی ہائی کمیشن کےا ئیراتاشی گروپ کیپٹن ونگ کمانڈرابھی نندن لے کرجائیں گے۔
دفترخارجہ نے بھارتی قائم مقام ہائی کمشنر کو پائلٹ حوالگی سےمتعلق باضابطہ طورپرآگاہ کردیا
بھارتی قائم مقام ہائی کمشنر دفترخارجہ پہنچے ، جہاں انھیں پائلٹ حوالگی سےمتعلق باضابطہ طورپرآگاہ کردیا ہے ، سہ پہر3بجےبھارتی پائلٹ کوبذریعہ واہگہ بارڈرواپس بھیجاجائے گا، بھارتی ایئراتاشی گروپ کیپٹن پائلٹ ابھی نندن کے سفری دستاویزات لیکر لاہو رروانہ ہوگئے ہیں۔
سفارتی ذرائع کا کہنا ہے کہ واہگہ بارڈرپرابھی نندن کوبھارتی ہائی کمیشن حکام کےحوالے کیاجائے گا، گروپ کیپٹن جے ٹی کرین بھارتی پائلٹ کو بھارت چھوڑنے جائیں گے۔
ذرائع کا کہنا ہے کہ پاکستانی فضائی حدودبندہونےسےکوئی طیارہ پاکستان نہیں آرہا، فضائی حدود بند ہونے پر پائلٹ کو واہگہ کے راستے لے جانے کا فیصلہ کیا گیا ہے۔
گذشتہ روز وزیراعظم عمران خان نے قومی اسمبلی کے مشترکہ اجلاس میں خطاب کرتے ہوئے گرفتار بھارتی پائلٹ کو رہا کرنے کا اعلان کیا تھا اور کہا تھا کہ بھارت اس سےزیادہ کشیدگی کوآگے نہ بڑھائے، کشیدگی کم کرنے اور امن کو ہماری کمزوری نہ سمجھاجائے۔
مزید پڑھیں : وزیر اعظم عمران خان کا امن کی خاطر بھارتی پائلٹ کو کل رہا کرنے کا اعلان
وزیر اعظم کا کہنا تھا کہ کشیدگی کی بنیادی وجہ مقبوضہ کشمیر ہے، گزشتہ4سال میں بھارت نے مقبوضہ کشمیر میں ظلم کی انتہا کی، مقبوضہ کشمیر میں تحریک مزید مضبوط ہوگئی ہے، مقبوضہ کشمیر میں اب کوئی بھی کشمیری لیڈر بھارت کیساتھ نہیں رہنا چاہتا، کوئی بھی کشمیری اس وقت آزادی کے علاوہ اورکچھ سننے کیلئے تیار نہیں۔
انھوں نے کہا تھا پاکستان امن چاہتا ہے، چاہتے ہیں خطہ ترقی کرے اور غربت کا خاتمہ ہو، اس قسم کی کشیدگی نہ پاکستان کوفائدہ دیتی ہے نہ بھارت کوفائدہ دیتی ہے۔
بھارتی پائلٹ کو رہائی دینے کے اعلان پر وزیراعظم عمران خان کو دنیا بھر سے پذیرائی ملی اور ابھی نندن کی رہائی کے اعلان کو زبردست اقدام قرار دیا۔
واضح رہے 27 فروری کو پاکستان نے فضائی حدود کی خلاف ورزی پر بھارت کےدو طیارے مارگرائے تھے اور پائلٹ ابھی نندن کوگرفتارکرلیا تھا، جس کے بعد بھارت نے بھی طیاروں کی تباہی اور پائلٹ لاپتہ ہونے کا اعتراف کیا تھا۔
مزید پڑھیں : پاکستانی قیدی: بھارتی پائلٹ پاک فوج کا شکر گزار
ڈی جی آئی ایس پی آر نے بتایا تھا بھارتی طیارے پاکستانی حدود میں نشانہ بنائے، ایک طیارہ آزاد کشمیر دوسرا مقبوضہ کشمیر کی حدود میں گرایا۔
گرفتاربھارتی پائلٹ نے بیان میں کہا تھا کہ وہ ونگ کمانڈرابھی نندن کمارہےاوراس کاسروس نمبرٹو سیون نائن ایٹ ون ہے جبکہ پاکستان کے بہترین سلوک کی تعریف کی تھی۔
ابھی نندن کا کہنا تھا کہ پاک فوج کا رویہ پیشہ وارانہ اور متاثر کن ہے ہماری فوج کو ایسا رویہ اپنانا چاہیے۔
