اسلام آباد : بھارت کی جانب سے سندھ طاس معاہدہ کی معطلی کا جائزہ لینے کے لئے پاکستان نے ماہرین پر مشتمل تھنک ٹینک تشکیل دینے کا فیصلہ کرلیا۔
تفصیلات کے مطابق پاکستان نے بھارت کی جانب سے سندھ طاس معاہدہ کی معطلی پر غور شروع کردیا۔
ذرائع انڈس واٹرکمیشن نے بتایا کہ وزارت خارجہ، آبی وسائل اور انڈس کمیشن ماہرین پرمشتمل تھنک ٹینک تشکیل دینے کا فیصلہ کیا گیا ہے۔
ذرائع نے کہا کہ تھنک ٹینک ہنگامی بنیادوں پر معاہدے کی معطلی پر اپنی رائے کابینہ کو دے گا، جس کے بعد وزیر اعظم کابینہ ماہرین کی رائے پر مزید حکمت عملی کا فیصلہ کریں گے۔
مزید پڑھیں : سندھ طاس معاہدہ : کیا بھارت پاکستانی دریاؤں کا پانی روک سکتا ہے؟ شیراز میمن کے اہم انکشافات
ذرائع کا کہنا تھا کہ پاکستان کی قانونی و آئینی پوزیشن بھارت کےمقابلے انتہائی مضبوط ہے، انڈس واٹر ٹریٹی سے ہٹ کر بھارت نے یکطرفہ غلط اقدام اٹھایا ہے، پاکستان جلد قانونی ماہرین کی رپورٹ کی روشنی میں ورلڈ بینک جانے کا اعلان کرسکتا ہے۔
اقوام متحدہ سے رابطہ اوردیگرسفارتی اقدمات بھی زیر غور ہیں، پاکستان سندھ طاس معاہدے پر کبھی خلاف ورزی کا مرتکب نہیں ہوا۔
انڈس کمیشن ذرائع کا کہنا تھا کہ پاکستان کشن گنگا بگلہیار ڈیم اور رتلےڈیم پر ورلڈ بینک سے ثالثی لےچکاہے۔
