اسلام آباد : رواں مالی سال 24-2023 کا اقتصادی سروے آج جاری کیا جائے گا، حکومت اہم معاشی ہدف حاصل کرنے میں ناکام رہی ہے۔
تفصیلات کے مطابق وزیر خزانہ محمد اورنگزیب رواں مالی سال کا اقتصادی سروے آج جاری کریں گے اور سروے کے اہم نکات پر بریفنگ دیں گے۔
رواں مالی سال حکومت کو اہم معاشی اہداف کے حصول میں ناکامی کا سامنا رہا، اقتصادی سروے کی دستاویز میں بتایا گیا کہ مالیاتی خسارے کا ہدف حاصل نہیں کیاجاسکا، مالیاتی خسارہ ہدف سے تقریباً 20 فیصدزیادہ ریکارڈ ہوا۔
رواں مالی سال مہنگائی ہدف سے3.5فیصد زائدریکارڈ ہوئی ، مہنگائی کا ہدف21فیصدتھا لیکن اوسطاً مہنگائی 24.5 فیصدریکارڈ ہوئی۔
رواں مالی سال کے دوران سرمایہ کاری لانے کا ہدف بھی حاصل نہ کیا جاسکا۔
جولائی سے اپریل کے دوران کپاس کی پیداوار کا ہدف حاصل نہ ہو سکا،کپاس کی پیداوار کا ہدف12.8ملین کی نسبت 10.4 ملین گانٹھ رہی۔
رواں مالی سال ایف بی آر ٹیکس محصولات میں30.8 فیصد اضافہ ہوا، برآمدات میں 10.6 فیصد اضافے کے ساتھ درآمدات میں 2.4 فیصد کمی ہوئی۔
دستاویز بیرونی سرمایہ کاری 8.1 فیصد اضافے سے ایک ارب 45 کروڑ ڈالر سے زائدرہی جبکہ اسمگلنگ کنٹرول کرنے سے ڈالر 326.5 روپے سے کم ہو کر 278 روپے پر آیا۔
رواں مالی سال جی ڈی پی گروتھ کا ہدف حاصل نہیں کیا جا سکا، جی ڈی پی گروتھ 2.38 فیصد ریکارڈ کی گئی۔
، اکنامک سروے دستاویز میں کہا گیا کہ زرعی شعبے کی گروتھ 6.25 فیصد،صنعتوں کی 1.21 فیصد ریکارڈ ہوئی، خدمات کے شعبے کی گروتھ 1.21 فیصد ریکارڈ کی گئی۔
سیمنٹ کی پیداواری گروتھ 3 فیصد کے ساتھ 41.7 ملین ٹن رہی، رواں مالی سال کے دوران ٹریکٹرز کی پیداوار میں 54.6 فیصد اضافہ ہوا ، 39 ہزار 546 ٹریکٹرز مینوفیکچر کیے۔
کھاد کی پیداوار 14.5 فیصد اضافے کیساتھ 6.29 ملین ٹن ریکارڈ کی گئی ، ایس ای سی پی میں کمپنیوں کی رجسٹریشن میں17.4 فیصد کمی ریکارڈ ہوئی۔
رواں مالی سال زرعی شعبے کو 33.8 فیصد اضافی قرض دیا گیا، جولائی سے اپریل مالیاتی خسارہ جی ڈی پی کا 4.5 فیصد ریکارڈ کیا گیا۔
ملکی قرضوں کا مجموعی حجم 67525 ارب روپے تک پہنچ گیا جبکہ مقامی قرضوں کا حجم 43432 ارب روپے ریکارڈ کیا گیا، مقامی قرضوں میں 4644 ارب روپے کا اضافہ ہوا جبکہ بیرونی قرضوں کا حجم 24093 ارب روپے ریکارڈ جی ڈی پی کا مجموعی حجم ایک لاکھ 6045 ارب روپے ریکارڈ ہوا۔
اس کے علاوہ رواں مالی سال کے دوران اسٹاک مارکیٹ 73754 پوانٹس تک ریکارڈ ہوئی۔
