اسلام آباد: پاک برطانیہ تجارت کے سلسلے میں وزیر اعظم کے معاون خصوصی جواد ملک نے برطانوی ہائی کمشنر سے ملاقات کی ہے۔
تفصیلات کے مطابق وزیر اعظم کے معاون خصوصی جواد ملک نے آج منگل کو اسلام آباد میں برطانوی ہائی کمشنر اینڈریو ڈیلگلیش سے ملاقات کی، جس میں باہمی دل چسپی کے امور پر تبادلہ خیال کیا گیا۔
معاون خصوصی جواد ملک نے بتایا کہ ملاقات میں پاکستان اور برطانیہ کے مابین تجارت سے متعلق تفصیلی بات چیت ہوئی، غیر ملکی سرمایہ کاروں کے جائز تحفظات دور کرنا وقت کی اہم ضرورت ہے۔
معاون خصوصی نے کہا کہ ملاقات میں پاکستان کو تجارت دوست ملک بنانے کے لیے ممکنہ اقدامات بھی زیر غور آئے، انھوں نے کہا برطانیہ میں 16 لاکھ سے زائد پاکستانی نژاد شہری مقیم ہیں، ان شہریوں کے مسائل اور ان کے حل پر بھی تفصیلی بات چیت ہوئی ہے۔
