19ستمبر 1998 کو آج ہی کے دن پاکستان نے روایتی حریف بھارت کے غرور کو خاک میں ملاتے ہوئے ون ڈے میں تاریخی فتح حاصل کی تھی۔
ٹورنٹو میں کھیلے گئے اس میچ میں شاہدخان آفریدی کی دھواں دھار سنچری نے بھارتی سورماؤں کو گھٹنے ٹیکنے پر مجبور کر دیا تھا۔
لیجنڈ بیٹسمین انضمام الحق کے ساتھ مل کر شاہدآفریدی نے 187 رنز کی ریکارڈ پارٹنرشپ قائم کر کے 316 رنز کا بڑا اسکور کیا اور ہدف کے تعاقب میں ٹیم انڈیا کے 11 کھلاڑی مل کر بھی گرین شرٹس کی اس پارٹنرشپ کے برابر اسکور نہ کر سکے۔
بھارتی ٹیم 182 رنز پر ڈھیر ہوئی اور یوں گرین شرٹس نے 134 رنز کے بڑے مارجن سے نہ صرف فتح حاصل کی بلکہ پانچ میچوں کی سیریز بھی جیتی۔
شاہد آفریدی نے 94 گیندوں پر 109 رنز کی باری کھیلی جس میں 7 چوکے اور 6 چھکے شامل تھے۔ انضمام الحق نے 78 اور کپتان عامرسہیل نے 46 رنز بنائے تھے۔
آف اسپنرثقلین مشتاق نے 20 رنز دے کر 3 وکٹیں حاصل کیں اور کپتان عامر سہیل نے 2 کھلاڑیوں کو پویلین کی راہ دکھائی۔
