پاکستان نے ایڈیلیڈ میں کھیلے گئے ون ڈے میچ میں فتح حاصل کر کے تین میچوں کی سیریز ایک، ایک سے برابر کر دی، فیصلہ کن میچ اتوار کو کھیلا جائے گا۔
پاکستان اور آسٹریلیا کے درمیان تین ون ڈے میچوں پر مشتمل سیریز کے ایڈیلیڈ میں کھیلے گئے دوسرے میچ میں پاکستانی بولرز کے بعد بیٹرز نے بھی شاندار کارکردگی کا مظاہرہ کیا اور 164 رنز کا ہدف با آسانی ایک وکٹ کے نقصان پر 26.3 اوورز میں حاصل کر کے سیریز ایک ایک سے برابر کر دی۔ یہ پاکستان کی آسٹریلوی سر زمین پر ون ڈے میچ میں سات سال بعد فتح ہے۔
View this post on Instagram
View this post on Instagram
پاکستانی اوپنرز صائم ایوب اور عبداللہ شفیق نے 164 رنز کے ہدف کے تعاقب میں شاندار بیٹنگ کا مظاہرہ کیا اور ٹیم کو سنچری پارٹنر شپ فراہم کرتے ہوئے 137 رنز کا آغاز فراہم کیا۔ اس دوران دونوں اوپنرز نے نصف سنچریاں مکمل کیں۔
View this post on Instagram
صائم ایوب نے جارحانہ انداز اپناتے ہوئے 71 رنز پر 82 رنز کی اننگ کھیلی۔ ان کی اس شاندار اننگ میں 6 چھکے اور 5 چوکے شامل تھے۔ انہیں زمپا نے اس وقت آؤٹ کیا جب پاکستان جیت سے صرف 27 رنز کی دوری پر تھا۔
View this post on Instagram
دوسرے اینڈ پر عبداللہ شفیق بھی آسٹریلوی بولرز کے سامنے ڈٹ کر کھڑے رہے اور 69 گیندوں پر 64 رنز کی نا قابل شکست اننگ کھیل کر میدان سے باہر آئے۔ بابر اعظم 15 رنز کے ساتھ ناٹ آؤٹ رہے۔
View this post on Instagram
اس سے قبل آسٹریلیا کی پوری ٹیم پہلے بیٹنگ کرتے ہوئے صرف 35 اوورز تک ہی پاکستانی بولرز کے سامنے ٹک سکی اور 163 رنز پر ڈھیر ہوگئی۔
View this post on Instagram
حارث رؤف نے آسٹریلیا کی بیٹنگ لائن میں تباہی مچائی اور میچ میں 5 وکٹیں حاصل کر کے اپنے کیریئر میں دوسری بار یہ کارنامہ انجام دیا، جب کہ کپتان محمد رضوان نے وکٹوں کے پیچھے 6 کیچز لے کر ایک میچ میں کیچز کا عالمی ریکارڈ برابر کیا، اگر وہ زمپا کا کیچ ڈراپ نہ کرتے تو کرکٹ کی تاریخ کا نیا ورلڈ ریکارڈ اپنے نام کر لیتے۔
View this post on Instagram
کینگروز کی جانب سے سب سے زیادہ اسکور اسٹیو اسمتھ نے 35 رنز بنایا۔ ان کے علاوہ کوئی دوسرا بلے باز 20 کا ہندسہ بھی عبور نہ کر سکا۔
میتھیو شارٹ (19)، جوش انگلس اور ایڈم زمپا (18، 18)، میکسویل (16) رنز کی مختصر اننگز ہی کھیل سکے۔
پاکستان کی جانب سے سب سے کامیاب بولر حارث رؤف رہے جنہوں نے 8 اوورز میں 29 رنز دے کر 5 وکٹیں حاصل کیں۔ شاہین شاہ آفریدی نے 26 رنز کے عوض 3 وکٹوں کا سودا کیا۔ نسیم شاہ اور حسنین کے ہاتھ ایک، ایک وکٹ آئی۔ حارث رؤف کو میچ کا بہترین کھلاڑی قرار دیا گیا۔
View this post on Instagram
آج کے میچ کے لیے پاکستان ٹیم میں کوئی تبدیلی نہیں کی گئی تھی جب کہ آسٹریلیا نے ایک تبدیلی کرتے ہوئے شان ایبٹ کی جگہ جوش ہیزل ووڈ کو شامل کیا تھا۔
اس جیت کے ساتھ ہی تین ون ڈے انٹرنیشنل میچوں کی سیریز ایک، ایک سے برابر ہوگئی ہے۔ سیریز کا تیسرا اور فیصلہ کن میچ اتوار 10 نومبر کو پرتھ میں کھیلا جائے گا جو پاکستانی وقت کے مطابق صبح ساڑھے 8 بجے شروع ہوگا۔
واضح رہے کہ پاکستان نے آسٹریلیا کی سر زمین پر پہلی اور آخری بار ون ڈے سیریز 2002 میں وقار یونس کی قیادت میں جیتی تھی اور محمد رضوان کے پاس اگلا میچ جیت کر بطور کپتان اپنی پہلی ہی سیریز آسٹریلیا جیسی مضبوط ٹیم کے خلاف جیت کر تاریخ میں نام درج کرانے کا بہترین موقع ہوگا۔
