پاکستان نے ٹی 20 بلائنڈ ورلڈ کپ جیت لیا ملتان میں کھیلے گئے فائنل میچ میں بنگلہ دیش کو با آسانی 10 وکٹوں سے شکست دی۔
پاکستان بلائنڈ ٹی 20 ورلڈ کپ کا نیا چیمپئن بن گیا ہے۔ پورے ٹورنامنٹ میں نا قابل شکست رہنے والی گرین شرٹس ٹیم نے ملتان میں کھیلے گئے ایونٹ کے سب سے بڑے مقابلے فائنل میچ میں بنگلہ دیش کو با آسانی 10 وکٹوں سے ہرا کر ٹائٹل اپنے نام کیا۔
بنگلہ دیش نے پہلے کھیلتے ہوئے مقررہ 20 اوورز میں 139 رنز بنائے اور پاکستان نے مطلوبہ 140 رنز کا ہدف بغیر وکٹ کھوئے صرف 11 ویں اوور میں حاصل کر لیا۔
پاکستان کی جانب سے کپتان نثار علی نے 72 رنز کی طوفانی اننگ کھیلی جب کہ صفدر نے 47 رنز بنا کر ٹیم کی جیت میں اپنا کردار ادا کیا۔
واضح رہے کہ چوتھا بلائنڈ ٹی 20 ورلڈ کپ پاکستان کے دو شہروں لاہور اور ملتان میں کھیلا گیا۔
بھارت نے روایتی ہٹ دھرمی کا مظاہرہ کرتے ہوئے اپنی ٹیم پاکستان نہیں بھیجی جس کے باعث قواعد کے مطابق اس کے پوائنٹس حریف ٹیموں کو دے دیے گئے۔
تاہم بھارت کو اپنی ٹیم پاکستان نہ بھیجنے کا خمیازہ آئندہ برس ہونے والے ویمنز بلائنڈ ٹی 20 ورلڈ کپ کی میزبانی گنوا کے اٹھانا پڑا اور اب یہ ایونٹ نیوٹرل مقام پر ہوگا۔
