آکلینڈ: پاکستان نے نیوزی لینڈ کو دوسرے ٹی 20 میں شکست دے دی۔ پاکستان نے میزبان ٹیم کو 202 رنز کا ہدف دیا تھا۔
تفصیلات کے مطابق سیریز کا دوسرا ٹی 20 میچ آج نیوزی لینڈ کے شہر آکلینڈ میں کھیلا گیا۔ پاکستان ٹیم میں ایک تبدیلی کرتے ہوئے محمد نواز کی جگہ احمد شہزاد کو شامل کیا گیا۔
پاکستان نے نیوزی لینڈ کے خلاف ٹاس جیت کر پہلے بیٹنگ کرتے ہوئے میزبان ٹیم کو 202 رنز کا ہدف دیا۔
پاکستان نے مقررہ اوورز میں 4 وکٹوں کے نقصان پر 201 رنز بنائے جبکہ ٹاپ آرڈر کے چاروں بلے باز 40 سے زیادہ رنز بنانے کا ریکارڈ بنانے میں بھی کامیاب رہے۔
فخر زمان اور بابر اعظم نے نصف سنچری اسکور کی جبکہ احمد شہزاد نے 44 اور کپتان سرفراز احمد نے 41 رنز بنائے۔ نیوزی لینڈ کی جانب سے بی ایم وہیلر نے 2 وکٹیں حاصل کیں۔
جوابی اننگز میں نیوزی لینڈ کی بیٹنگ آغاز سے ہی مشکلات کا شکار رہی۔ پاکستان کے 202 رنز کے ہدف کے تعاقب میں کیوی ٹیم 153 پر ڈھیر ہوگئی۔
ایم جے سنچنر نے سب سے زیادہ 37 اور بی ایم وہیلر نے 30 رنز بنائے۔ قومی ٹیم کے فہیم اشرف نے 3، محمد عامر اور شاداب خان نے 2، 2 وکٹیں لیں۔
نیوزی لینڈ کے خلاف تیسرا اور آخری ٹی 20 اتوار 28 جنوری کو کھیلا جائے گا جس میں سیریز کے فاتح کا فیصلہ ہوگا۔
یاد رہے کہ ویلنگٹن میں کھیلے جانے والے پہلے ٹی 20 میں پاکستان کو شکست کا سامنا کرنا پڑا تھا۔ نیوزی لینڈ نے جارحانہ بیٹنگ کرتے ہوئے 15 اوورز میں دیا گیا ہدف مکمل کر کے 7 وکٹوں سے فتح اپنے نام کرلی تھی۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔
